Xo‘jaobod tumanida “Andijon” futbol klubi uchun zamonaviy mashg‘ulot bazasi foydalanishga topshirildi. Bu haqda viloyat hokimligi matbuot xizmati xabar berdi.
Yangi kompleksning umumiy qiymati 31 milliard so‘mni tashkil etadi. Bazada sportchilar uchun uch qavatli yotoqxona, ikkita futbol maydoni, har birida ming kishilik tribunalar, shuningdek, mehmonxona, shug‘ullanish uchun zal, yopiq suzish havzasi va ovqatlanish joylari mavjud.
Mazkur sport majmuasi 114 nafar futbolchini bir vaqtning o‘zida qabul qilish imkoniyatiga ega bo‘lib, asosiy jamoa bilan birga “Andijon”ning yoshlar jamoasi ham bu yerda mashg‘ulot olib boradi.
So‘nggi yillarda jismoniy tarbiya va sportga berilayotgan e’tibor o‘z samarasini bermoqda. Xususan, futbol xalq orasida ommalashib, katta yutuqlarga erishilmoqda. Milliy terma jamoamiz xalq orzusini ro‘yobga chiqardi, “Andijon” klubi esa o‘tgan mavsumda O‘zbekiston kubogini yutib, endi Osiyo Chempionlar Ligasida qatnashadi. Bu — albatta, katta faxr, dedi Andijon viloyati hokimi Shuhrat Abdurahmonov.
Klub rahbariyati mazkur sport inshooti FIFA va Osiyo futbol konfederatsiyasi (OFK) talablari asosida qurilganini ta’kidladi. Ular yangi baza Markaziy Osiyoda shu turdagi birinchi va eng ilg‘or sport majmuasi ekani bilan faxrlanishlarini bildirib o‘tishdi.
Izoh (0)