Statistika qo‘mitasi 2024-yildagi O‘zbekiston aholisining ijtimoiy muhofazasi bo‘yicha maʼlumotlarni eʼlon qildi.
Qo‘mita o‘tgan yili O‘zbekistonda pensiya oluvchilar umumiy soni 4 million 246 ming kishiga yetganini qayd etgan. Yil davomida pensionerlar soni 2023-yildagidan 93,9 ming kishiga (2,3 foiz) ko‘paygan.
Pensiya oluvchilarning eng ko‘p qismi Farg‘ona (496,9 ming kishi), Samarqand (449,9 ming kishi) viloyatlari va Toshkent shahri (395,6 ming kishi) hissasiga to‘g‘ri kelgan. Eng kam son esa Sirdaryo (108,9 ming kishi), Jizzax (143,6 ming kishi) va Navoiy (145,1 ming kishi) viloyatlarida qayd etilgan.
Qo‘mita pensiya va nafaqa oluvchilarning har 10 000 aholiga nisbatan ulushini ham hisoblab chiqqan. Bunda pensionerlar ulushi o‘rtacha 1 131 kishi, nafaqaxo‘rlar 186 kishini tashkil etgan.
Pensiya oluvchilarning har 10 000 aholiga nisbatan eng ko‘p qismi Navoiy (1 326 kishi), Buxoro (1 299 kishi) va Toshkent (1 271 kishi) viloyatlarida yashaydi. Boshqa hududlarga qaraganda kam ko‘rsatkichlar Jizzax (934 kishi), Surxondaryo (963 kishi) va Qashqadaryo (1 041 kishi) viloyatlarida aniqlangan.
2024-yilda respublikada nafaqa oluvchilar umumiy soni 698,6 ming kishiga yetgan. Mazkur ko‘rsatkich 2023-yildagiga nisbatan 24,2 ming kishiga (3,6 foiz) yuqori.
Nafaqa oluvchilarning eng ko‘p qismi Samarqand (83,0 ming kishi) va Qashqadaryo (81,6 ming kishi) viloyatlarida, eng kam qismi esa Sirdaryo (21,4 ming kishi), Navoiy (24,0 ming kishi) va Buxoro (28,6 ming kishi) viloyatlarida qayd etilgan.
Lekin qo‘mita umumiy nafaqa oluvchilar deya yozgan bo‘lsa-da bolalar nafaqasi oluvchi oilalar sonini keltirmagan ko‘rinadi. Chunki Ijtimoiy himoya agentligi 2024-yilda 1 million 269 mingta kam taʼminlangan oilalarga bolalar nafaqasi va moddiy yordam to‘langanini maʼlum qilgan. Bundan tashqari, ish stajiga ega bo‘lmagan va mehnatga layoqatsiz 696,8 ming kishiga nafaqa berilgani ochiqlangan. Shundan 307,7 ming shaxs nogironlik nafaqasi, 167,1 ming kishi bolalarga nogironlik nafaqasi olgan.
Statqo‘mga ko‘ra, o‘tgan yili mamlakatda nogironligi bo‘lgan shaxslar soni 1 million 20 ming kishini tashkil etgan. Bu raqam 2020-yildagiga nisbatan 262,5 mingtaga ko‘p.
Nogironligi bo‘lgan shaxslar soni quyidagi guruhlar asosida taqsimlangan:
- 18 yoshgacha nogironligi bo‘lgan bolalar — 173,3 ming nafar
- I guruh — 94,2 ming nafar
- II guruh — 688,1 ming nafar
- III guruh nogironligi bo‘lgan shaxslar soni — 65,2 ming nafar.
Ma’lumot uchun, 2025-yil 1-iyuldan respublikada pensiya va nafaqalar miqdorlari 10 foizga oshirildi. Yangi miqdorlar quyidagicha bo‘ladi:
- yoshga doir eng kam pensiya miqdori — oyiga 918 000 so‘m;
- nogironlik pensiyalarining eng kam miqdori — oyiga 1 012 000 so‘m;
- kam taʼminlangan oilalarga bolalar nafaqasining har oylik miqdori:
- 3 yoshgacha bo‘lgan bitta kichik farzandi uchun — 360 000 so‘m,
- 3 yoshdan 18 yoshgacha bo‘lgan bitta farzandi uchun — 275 000 so‘m;
- oilaning ikkinchi farzandi uchun qo‘shimcha — 165 000 so‘m;
- oilaning uchinchi va undan keyingi har bir farzandi uchun qo‘shimcha — 110 000 so‘m;
- kam taʼminlangan oilalar uchun moddiy yordamning oylik miqdori — 420 000 so‘m.
Izoh (0)