Mamlakatda pul massasi tarixiy rekord qayd etdi. Bu haqdagi maʼlumot Markaziy bank tomonidan eʼlon qilindi.
Joriy yil 1-iyul holatiga ko‘ra, O‘zbekistondagi pul massasi 312,5 trln so‘mga yetdi. Mazkur miqdor respublika iqtisodiy tarixida birinchi marta qayd etildi.
May oyi yakunida pul massasi hajmi ilk marta 300 trln so‘mdan oshgandi. Iyun oyida mamlakatdagi umumiy pul hajmi 12,3 trln so‘mga ko‘paydi (oxirgi bir yilda esa 76 trln so‘mga o‘sdi).
Bunda asosiy o‘sish milliy valyuta hisobiga (10,6 trln so‘m) yuz berdi. O‘tgan oy yakunida so‘mdagi pul massasi 250 trln so‘mga yetgan.
Iyun oyida muomalada bo‘lgan naqd pullar 3,9 trln so‘mga ko‘payib, jami 59,1 trln so‘mni tashkil etdi.
2013-yil 1-fevralda Markaziy bank ilk bor O‘zbekistondagi pul massasini eʼlon qilgan. O‘shanda mamlakatdagi umumiy pul hajmi 24,4 trln so‘m bo‘lgan. 2020-iyuniga kelib bu ko‘rsatkich 100 trln so‘mdan, 2023-yil noyabrda esa 200 trln so‘mdan o‘tgan.
Izoh (0)