Malika Diananing garderobidagi baʼzi buyumlar iyun oyi oxirida sotuvga qo‘yiladi. Reuters xabariga ko‘ra, bu uning auksionga qo‘yilgan eng katta kolleksiyasi bo‘ladi.
Princess Dianaʼs Style & A Royal Collection (“Malika Diana uslubi va qirollik kolleksiyasi”) deb nomlangan savdolar 26-iyun kuni bo‘lib o‘tadi. “Bu malika Diananing eng yirik kimoshdi savdosi, chunki bizda uning 100 dan ortiq buyumlari bor”, dedi Julienʼs Auctions ijrochi direktori Martin Nolan.
Lotlar orasida ko‘ylaklar, shlyapalar, poyabzallar va sumkalar bor. Masalan, muxlislar va kolleksionerlar 1988-yilda Bellville Sassoon kompaniyasining gul bosilgan ipak ko‘ylagini sotib olish imkoniyatiga ega bo‘ladi, unda malika bir necha bor kasalxonalarga tashrif buyurgan. Mahsulot 200-300 ming dollarga sotib olinishi taxmin qilinmoqda.
Shuningdek, auksionda Dianaga Fransiyaning birinchi xonimi Bernadett Shirak sovg‘a qilgan Dior sumkasi, Janni Versache tomonidan yaratilgan yengsiz ko‘k ko‘ylak va libos eskizlari ham taqdim etiladi.
Kimoshdi savdosiga Yelizaveta II va ona-qirolichaga tegishli buyumlar ham qo‘yiladi. Tushgan mablag‘ning bir qismi Muscular Dystrophy UK xayriya tashkilotiga yo‘naltiriladi.
Malika Diananing buyumlari bir necha bor savdoga qo‘yilgan. 2023-yilda uning qora-ko‘k rangli oqshom libosi rekord narxda — 1,14 million dollarga sotilgan.
Izoh (0)