Toyota kompaniyasi joriy yilning kuzida yakunlanishi kutilayotgan tarixiy voqea — Woven City (“To‘qilgan shahar”) loyihasini ishga tushirishga tayyorlanmoqda. Bu dunyodagi birinchi “aqlli” shahar bo‘lib, unda robotlar, sun’iy intellekt va avtonom transport vositalari kundalik hayotda faol ishtirok etadi.
Boshlanishi 2020-yilda e’lon qilingan ushbu loyiha nihoyat hayotga tatbiq etilmoqda. Tokio shahridan 140 kilometr uzoqlikdagi Sidzuka prefekturasida, ilgari Xigashi-Fudzi zavodi joylashgan hududda alohida shaharcha barpo etildi. Loyihaning asosiy maqsadi kelajak texnologiyalarini real hayot sharoitida sinovdan o‘tkazish.
Shaharning dastlabki aholisi Toyota kompaniyasi xodimlari va ularning oila a’zolaridan iborat 100 kishi bo‘ladi. Yaqin yillarda bu raqam 360 nafarga yetkaziladi, uzoq muddatli rejalarda esa aholi soni 2000 kishigacha oshiriladi.
Woven City haqida
Shaharda 2020-yilgi Olimpiada uchun ishlab chiqilgan e-Palette nomli haydovchisiz elektromobillar harakatlanadi. Yo‘llar uch turga bo‘linadi: piyodalar uchun, velosipedlar uchun va robotaksilar uchun alohida harakat yo‘laklari.
Barcha binolar zamonaviy sensorlar bilan jihozlangan. Energiya manbayi sifatida vodorod yonilg‘i elementlari va quyosh panellaridan foydalaniladi. Shaharda suvni qayta ishlash tizimi hamda chiqindini boshqarishning ilg‘or texnologiyalari yo‘lga qo‘yiladi. Uy-ro‘zg‘or ishlari uchun robot yordamchilari jalb etiladi, sun’iy intellekt esa aholining sog‘lig‘ini nazorat qiladi, energiya iste’molini boshqaradi va hatto yerosti tunnel tizimi orqali yuk yetkazib berish bilan shug‘ullanadi.
Har bir bino, ko‘cha va xizmatlar yagona tarmoqqa ulanadi. Bu esa to‘liq ma’lumotlar to‘plamini yig‘ish, kelajakdagi shahar infratuzilmasi modellari ustida ishlash va zamonaviy texnologiyalarni bevosita real muhitda sinovdan o‘tkazish imkonini beradi.
Bundan tashqari, Woven City sun’iy intellekt, robototexnika va raqamli texnologiyalar tajribadan o‘tkaziladigan shahar sifatida yaratilgan. Unda olimlar, muhandislar va oddiy aholining hayoti o‘zaro uyg‘unlashtirilgan. Toyota bu loyihani yuritish uchun maxsus Woven Planet nomli sho‘ba kompaniya tashkil etgan bo‘lib, “woven” atamasi ham aynan shu umumiy integratsiya va hamkorlik falsafasini ifodalaydi.
“Biz hayotni qulayroq va ekologik toza qilishga xizmat qiladigan texnologiyalar shahri yaratmoqdamiz. Woven City — bu kelajakda butun dunyo bo‘ylab megalopolis tushunchasini o‘zgartirishi mumkin bo‘lgan innovatsiyalar uchun sinov maydonchasidir”, dedi Toyota kompaniyasi raisi Akio Toeda.
Hozircha shahar sayyohlar uchun yopiq, biroq Toyota 2026-yilda uni tashrif buyuruvchilar uchun ochishni rejalashtirgan. Hozirda esa butun dunyo robot shahar hayotini qiziqish bilan kuzatmoqda.
Izoh (0)