Mariya Antuanettaning yagona qizi va Lyudovik XVI ga tegishli bo‘lgan 10,38 karatli Mariya Tereza brillianti Nyu Yorkdagi Christie’s kim oshdi savdosida 13,9 million dollarga sotildi. Bu haqda auksion saytida xabar berildi.
Pushti brilliant va boshqa ba’zi qimmatbaho toshlarni Mariya Antuanetta 1791-yilda Parijdan qochish arafasida sartaroshiga ishonib topshirgan va bir kun kelib ularni qaytarib olish umidida bo‘lgan. Keyinchalik tosh Fransiya qirolichasining tirik qolgan yagona farzandi gersoginya Mariya Tereza de Angulga, keyin esa uning jiyani Mariya Tereza de Shamborga o‘tgan.
Brilliant fransuz, bavariyalik va avstriyalik imperator va qirollik oilalarida bo‘lgan. Oxirgi marta qimmatbaho tosh 1996-yilda Jenevadagi kimoshdi savdosida omma e’tiboriga tushgan edi. O‘shandan beri qimmatbaho tosh jamoatchilikdan chetda qoldi.
Christie’s ma’lumotiga ko‘ra, ilk baholashda uzukdagi pushti tosh 5–7 million dollarga baholan, biroq tarixiy qiymati va kamyobligi tufayli u juda yuqori narxda sotilgan.
Izoh (0)