Hindistonning Siyati qishlog‘ida bir it 67 kishini ko‘chkidan asrab qoldi. Tabiiy ofat butun qishloqni vayron qilgan, deb xabar berdi “RBK” nashri.
Hodisa 30-iyun tongida Himachal-Pradesh shtatining Mandi okrugida yuz bergan. Kechasi besh oylik kuchuk birdan juda baland ovozda hurishni boshlagan. Narendra ismli erkak aytishicha, u itning tovushidan uyg‘onib ketgan. So‘ng devordagi yoriqni payqagach, boshqa qo‘shnilarini ogohlantirish uchun yugurib chiqqan.
It va Narendraning sa’y-harakatlari tufayli 20 nafar oila uylarini vaqtida tark etishga ulgurgan. Oradan ko‘p o‘tmay qishloqda ko‘chki sodir bo‘lgan. Qutqarilgan odamlar vaqtinchalik boshpana sifatida Naine Devi ibodatxonasiga joylashtirilgan. Shtat hokimiyati har bir jabrlangan oilaga 10 ming hind rupiysi (taxminan 125 dollar) ajratgan.
So‘nggi ikki hafta ichida Mandi hududida kuchli yomg‘irlar yog‘ib, bir nechta ko‘chkilarga sabab bo‘lgan. 150 dan ortiq yo‘llar to‘silib qolgan, yuzlab uylar zarar ko‘rgan yoki butunlay buzilgan. NDTV portalining yozishicha, iyul boshlarida Himachal Pradesh shtatida ko‘chkilar va toshqinlar oqibatida kamida 50 kishi halok bo‘lgan.
Mandi okrugida yomg‘ir mavsumi odatda iyun oxiridan sentyabrgacha davom etadi — yillik yog‘ingarchilikning katta qismi aynan shu davrda yog‘adi. Mutaxassislarning fikricha, yog‘ingarchilik hajmining ortishi iqlim o‘zgarishi bilan bog‘liq: issiq havo ko‘proq namlikni ushlab qoladi, bu esa sel, yomg‘irlar va tog‘li hududlardagi ko‘chkilar xavfini kuchaytiradi.
Xuddi shunday ofatlar qo‘shni davlatlarda ham yuz bermoqda. Nepalda tog‘dan kelayotgan daryo oqimi Xitoy bilan chegaradagi asosiy ko‘prikni buzib yubordi, natijada kamida 18 kishi halok bo‘ldi. Xitoyda kuchli suv toshqini oqibatida 11 kishi bedarak yo‘qoldi. Janubi-g‘arbiy Osiyo mintaqasi esa ayni paytda “Danas” to‘foni bilan kurashmoqda. To‘fon Tayvanga ham zarba bergan bo‘lib, unda 2 kishi halok bo‘lgan, 330 kishi jarohat olgan.
Izoh (0)