Buyuk Britaniya qirollik oilasi hayotining barcha jabhalarida qat’iy protokol va an’analar asosida yashaydi. Bu qoidalar faqat rasmiy marosimlargina emas, balki kundalik turmush, jumladan, ovqatlanish tartibiga ham taalluqlidir. Ayniqsa, voris shahzodalar va malika Sharlottaning ovqatlanish odatlari qat’iy nazorat ostida bo‘lib, ular nafaqat sog‘lom hayot tarzi, balki saroy etiketi talablariga ham muvofiq shakllantiriladi. Quyida Britaniya monarxiyasida amal qilinadigan eng kutilmagan gastronomik cheklovlar va an’analar bilan tanishasiz.
Bolalar alohida, ota-onalar alohida ovqatlanadi
Qirollik oilasida kichik vorislar umumiy dasturxonga faqatgina ma’lum yoshga yetib, muloqot va dasturxon madaniyatini to‘liq o‘zlashtirgachgina qo‘shilishi mumkin. Shu sababli malika Sharlotta, shahzoda Jorj va shahzoda Lui odatda bolalar xonasida ovqatlanadi. Ilgari ularning otasi shahzoda Uilyam va amakisi Garri ham xuddi shunday tartibda ulg‘aygan. Bu qoidaga hatto bayram kunlari ham amal qilinadi: Masalan, Yangi yil bayrami kuni ham alohida bolalar dasturxoni tayyorlanadi.
Nimalar taqiqlangan, nimalar ruxsat etilgan?
Qirollik a’zolarining ovqatlanish ratsioni qat’iy nazorat qilinadi. Masalan, saroy protokoli bo‘yicha sarimsoq va achchiq taomlar qat’iyan man etilgan. Buning sababi bunday mahsulotlardan keyin og‘izda qoladigan yoqimsiz hiddir.
Biroq bu cheklovlar sog‘lom ovqatlanish tamoyillariga ziddiyat keltirmaydi: oshpazlar bolalar organizmi yetarli darajada vitamin olishini ta’minlashga intiladi. Hatto kartoshka pyuresiga ham foydali sabzavotlar aralashtiriladi.
Malika Sharlottaning sevimli taomlaridan biri pitsadir. Shuningdek, u zaytun mevalarini ham yoqtiradi. Bu jihatdan u o‘zining buvisi — marhuma qirolicha Yelizaveta II dan farq qiladi: qirolicha italyan taomlarini xushlamagan.
Kattalarga ham, bolalarga ham xom go‘sht, xususan, bifshteks va yarim pishgan steyklar, qisqichbaqasimon dengiz mahsulotlari iste’mol qilish man etilgan. Chunki ular yetarli darajada termik ishlanmaydi va infeksiyalar olib kelish xavfi yuqori.
Avvallari qanday bo‘lgan?
Uilyam va Keyt o‘z farzandlari Jorj, Sharlotta va Luini sog‘lom va erkin muhitda tarbiyalashga harakat qiladi. Ular bolalarcha erkalanishga ham, oshxonada onalariga yordam berishga ham imkon topadi. Keyt har doim ham saroy oshpazlariga tayanmaydi: ba’zida bolalari bilan birga o‘zi taom tayyorlaydi va ularni mehnatga jalb qiladi.
“Biri sutni quyadi, biri unni soladi, oxirgisi yog‘ni qo‘shadi”, degan edi u bir intervyusida, bolalarning pazandachilikdagi ishtiroki haqida gapirar ekan.
Marhuma qirolicha Yelizaveta II esa ancha talabchan bo‘lgan. Aynan u sarimsoqni taomlardan butunlay chiqarib tashlagan: qirolicha piyozning na hidi, na ta’miga toqat qilolmagan. Hatto Italiyaga safar oldidan bu masalada maxsus farmoyish ham chiqargan.
Umuman olganda, Italiya taomlari qirolicha Yelizavetaga yoqmagan: u kraxmalli oziq-ovqat mahsulotlarini, ayniqsa pitsa va pastani xushlamagan. Ularning hech biri hech qachon (!) Bukingem saroyi menyusida bo‘lmagan. Sababi bu taomlar qirollik gastronomik protokollariga mos kelmagan. Bundan tashqari, u pastani va pitsani “jirkanch” taomlar deb atagan.
Izoh (0)