Disney va NBCUniversal kompaniyalari Midjourney sunʼiy intellekt ishlab chiqaruvchisini mualliflik huquqini buzganlikda ayblab, unga qarshi sud jarayonini boshladi. Bu haqda Axios xabar bermoqda.
AQSHning Markaziy Kaliforniya okrug sudiga topshirilgan shikoyatda Midjourney kompaniyasiga intellektual mulk huquqlarini to‘g‘ridan to‘g‘ri va bilvosita buzganlik bo‘yicha daʼvo kiritildi. Kompaniya o‘zining til modelini o‘qitish uchun studiyalar muallifligidan foydalangani va ularning qahramonlariga o‘xshash tasvirlar yaratgani taʼkidlandi.
Dalil sifatida Midjourney vositasi “Qirol sher” va “Alouddin” multfilmlaridagi Disney qahramonlari kabi personajlarga o‘xshash tasvirlarni qanday yaratishini ko‘rsatadigan o‘nlab vizual misollar keltirilgan.
NBCUniversal ijrochi vitse-prezidenti va bosh yuristi Kim Harris kompaniyaning raqamli qaroqchilikka nisbatan nuqtayi nazarini bildirdi: “Qanday texnologiya ishlatilishidan qatʼi nazar, o‘g‘rilik o‘g‘rilikligicha qoladi va bu harakat bizning mualliflik huquqlarimizni ochiqdan ochiq buzish hisoblanadi”.
Aytgancha, yaqinda Eminemning Eight Mile Style nashriyot kompaniyasi Facebook, Instagram va WhatsApp egalik qiladigan Meta Platformsʼga qarshi sudga murojaat qilib, uni mualliflik huquqlarini buzganlikda aybladi va 109 million dollardan ortiq zarar qoplanishini talab qildi.
Izoh (0)