2025-yil sentyabr oyida Dubayda WOOHOO nomli yangi restoran ochilishi rejalashtirilmoqda. Odatdagi restoranlardan farqli ravishda bu yerda oshxonani boshqarish va menyuni tuzish jarayoni to‘liq sun’iy intellekt tomonidan amalga oshiriladi. “Kelajak restorani” deb nomlangan muassasa Dubay markazida, Burj Xalifa yaqinida joylashadi.
Restoran bosh oshpazi sifatida faoliyat yurituvchi Chef Aiman sun’iy intellekti minglab xalqaro retseptlar, mahsulotlarning molekulyar tarkibi va oziq-ovqat faniga oid ilmiy tadqiqotlar kabi bilimlarga ega. SI taomlarning tuzilmasi, kislotalilik darajasi kabi parametrlar asosida menyularni rejalashtiradi hamda noodatiy ingrediyentlardan tayyorlangan yangicha taomlarni taklif etadi.
Ovqatlarni esa haqiqiy oshpazlar tayyorlaydi. SI ishlab chiqqan retseptlar ustida yakuniy ishlov berish va taqdimot jarayonida inson omili muhim o‘rin tutadi. Restoran faoliyatida mashhur dubaylik oshpaz Reif Usmon ham jamoaga rahbarlik qiladi. Loyiha mualliflari qayd etishicha, SI insonlar mehnatini to‘liq almashtirishni emas, balki unga ijodiy sherik sifatida yordam berishni maqsad qilgan.
WOOHOO interyeri futuristik uslubda yaratilgan: unda LED panellar, texnologik yechimlar va hattoki maxfiy cyber-lounge zonalari bo‘ladi.
Restoran asoschilaridan biri Ahmet Oytun Chakirning aytishicha, bu loyiha butun gastronomiya sanoatida yangi bosqichni boshlab berishi mumkin. Kelgusida Chef Aiman’dan boshqa restoran tarmoqlari ham foydalanishi uchun litsenziyalash rejalashtirilmoqda.
Izoh (0)