Joriy yil 4-iyun kuni Sasseks gersogi shahzoda Garri va uning rafiqasi Megan Marklning kenja farzandi — malika Lilibet to‘rt yoshga to‘ldi. Tug‘ilgan kun munosabati bilan Megan ijtimoiy tarmoqlarda qizi bilan tushgan ikki suratni e’lon qildi.
Ushbu fotosuratlar ichida birinchisida ona qizini mehr bilan bag‘riga bosib turgani aks etgan bo‘lsa, ikkinchisida Lilibet hali yangi tug‘ilganida, tug‘uruqxonadagi holatida tasvirlangan.
Shu tariqa Megan Markl ilk bor qizi Lilibetning yuzini ommaga ko‘rsatdi. Ilgari u farzandlarining shaxsiy hayotini himoya qilish maqsadida suratlarni e’lon qilishdan tiyilgan.
“Go‘zal qizim, tug‘ilgan kuning bilan tabriklaymiz! To‘rt yil avval hayotimizga kirib kelganingdan beri har bir kunimiz yorqin va baxtga to‘la bo‘ldi. Qizimga go‘zal tilaklar yo‘llayotgan barchaga katta rahmat aytaman!” deb yozdi Megan o‘z sahifasida.
Megan va Garri 2020-yilda qirollik oilasidagi rasmiy majburiyatlardan voz kechib, AQSHga ko‘chib o‘tgan. Shundan beri ular alohida hayot kechirib kelmoqda va farzandlari 6 yoshli Archi va Lilibet tarbiyasi bilan shug‘ullanmoqda.
Biroq ayrim ommaviy axborot vositalarining yozishicha, shahzoda Garri rafiqasi tomonidan farzandlar suratini ommaga taqdim etishiga ijobiy qaramaydi. Ayniqsa, ushbu fotosuratlar uning shaxsiy brendi yoki Netflix’dagi oshpazlik dasturi uchun qo‘llanilishini shahzoda ma’qullamaydi.
Izoh (0)