Avvaldan rejalashtirilgan kun tartibi, doimiy safarlar va charchoq fonida kimdir tez tayyorlanadigan ovqatlarni afzal ko‘rsa, boshqalar sog‘lom va an’anaviy taomlardan voz kechmaydi. Quyida mashhur san’atkorlarning konsert va suratga olishlari vaqtida nimalar iste’mol qilishi haqida ma’lumot to‘pladik.
Jennifer Lourens
Jennifer qat’iy diyetalarga amal qiladigan aktrisalardan emas. “Och qoringa ishlashning iloji yo‘q”, deydi u va foydali bo‘lmagan taom bilan tamaddi qilishi mumkinligidan uyalmaydi. Masalan, “Amerikacha afera” filmini suratga olish jarayonida u chips tufayli libosini buzib qo‘ygan. Dizayner va libos mutaxassislari yog‘li dog‘ va maydalangan bo‘laklarni zudlik bilan tozalashga majbur bo‘lishgan. “Oskar-2013” marosimida esa aktrisaning zavq bilan pitsa yegan videolari mashhur bo‘lgan.
“‘Stop, tasvirga olish tugadi!’ degan so‘zdan so‘ng darrov ovqat haqida o‘ylay boshlayman”, deydi Jennifer kulib.
Ledi Gaga
O‘ziga xos uslubi va jo‘shqin energiyasi bilan tanilgan Ledi Gaga kuch-g‘ayratni asosan sabzavotlar, mevalar hamda pishloqdan oladi. U qayerda bo‘lmasin, ishda yoki dam olayotganida ham sog‘lom ovqatlanish qoidalariga amal qilishga harakat qiladi.
Gaga pardozxonasida doimiy ravishda yangi sabzavotlar, avokado hamda blender bo‘lishini talab qiladi. Uning yana bir sharti pishloq solingan likopcha va o‘n ikki shisha mineral suv bo‘lishidir.
Lyusya Chebotina
Rossiyalik xonanda to‘g‘ri ovqatlanishga doim rioya qiladi, ammo mazali narsalardan o‘zini tiya olmaydi. Uning ish stolida foydali mahsulotlardan tashqari, shokoladli qahva ham doim muntazir. Chebotinaning fikricha, san’atkorning asosiy vazifasi och yurib, o‘zni qiynash emas, balki qo‘shiq kuylab, tomoshabinlarni quvontirishdir.
Xonanda uchun eng muhim talab — ish joyida doimo o‘n shisha mineral suv bo‘lishi, chunki u suv ichish rejimiga qat’iy amal qiladi.
Sati Kazanova
Sati vegetarian va hind taomlari muxlisi. Hatto gastrollarga ham sevimli mahsulotlarining asosiy to‘plamini olib yuradi. Ammo vaqti juda qisqa bo‘lsa, eng oddiy mahsulotlarni tanlaydi. Yong‘oq, bo‘tqa, quruq mevalar uning asosiy ratsionidir.
Sati ovqatlanish tartibi haqida: “Ish bilan band bo‘lib, foydali taomlarni yeyishni unutish kerak emas, chunki ovqatlanish tartibi ham insonning o‘ziga g‘amxo‘rlik qilishning bir shakli”, degan fikrda.
Jennifer Eniston
Jenniferning bir ajoyib qoidasi bor — oq rangli taomlarni yemaydi. Tamaddilar haqida gap ketganda esa u albatta yorqin rangli va achchiq taomlarni, masalan, nachos yoki burritoni tanlaydi. “Hammasi mening kayfiyatimga bog‘liq, ammo Meksika oshxonasi mening sevimli taomlarimdir”, deydi aktrisa.
Izoh (0)