“Qalpoq” hajviy ko‘rsatuvi a’zosi, aktyor Jo‘rabek Norqulov shu yilning 13-iyul kuni vafot etdi. Uning o‘limiga uzoq davom etgan kasallik sabab bo‘lgan. Hamkasblari aktyorni xotirlab, uning o‘limiga sabab bo‘lgan kasallik haqida gapirdi.
Rahmonali Suropov, “Qalpoq” hajviy ko‘rsatuvi asoschisi va prodyuseri, aktyor:
— Jo‘rabek “Qalpoq”da tatar kampir Alfiyaning eri rolini o‘ynardi, bu obrazni ham o‘zi o‘ylab topgandi. Jamoaga kelgan payti rolni yaxshi o‘xshatib berdi va bizga qo‘shildi.
Bir xususiyati menga juda yoqardi — juda ozoda, tartibli yigit edi. O‘zi ijarada tursa ham, mendan chiroyli, tanlab kiyinardi. Menga ham bir narsalar ko‘tarib kelardi, pulini bersam olmasdi. Gastrolga borsak ham, ikkimiz bir xonada turadigan bo‘lsak, ertalab turganimda oyoq kiyimim yaltirab turgan bo‘lardi, yaltiratib qo‘yardi. Ko‘chada botinkamga loy tegib qolsa ham o‘tirib olib, artib qo‘yardi. Iye, unday qilma, odamlar qarayapti desam, qarasa qarar, ustoz derdi. Ana shunday qalbi toza yigit edi u.
Vafot etganiga ishongim kelmaydi, hozir ham bunga ishonmayapman. O‘tib ketganlarning ortidan yaxshi odam edi deyishadi, lekin u rostakamiga zo‘r inson edi. Uchta qizini uzatgan, bitta o‘g‘li qolgandi. Jannatga chiptani olib ketdi. Nasib qilsa, o‘g‘lining yaxshi kunida birga bo‘lamiz.
Hammamiz qiziqardik sanʼatga, lekin u boshqacha qiziqardi, deydi u.
Muxtor Halimov, aktyor:
— U hech kimga ismi bilan murojaat qilmasdi, erkaklarni ustoz, ayollarni senyorita derdi. Soat kechasi 3-4 dan bozorga ketardi, undan keyin dublyajga qatnardi, undan keyin ham qo‘shimcha ishlar topib yurardi. Bola-chaqam deb chumolidek tinmasdi. O‘g‘li yoniga kirib, toparmon yigit bo‘lganida, Jo‘rabekning og‘zi go‘shtga yetganda ketgani alam qiladi. Yaqinda uyga boshlang‘ich to‘lov qilgandi, o‘sha uy farzandlariga nasib qilsin endi, dedi aktyor.
Shirmonoy Abdullayeva, aktrisa:
— Hasratim ado bo‘lmaydi, u mening suyanganim edi. Farzandimga ham bunchalik suyanmaganman. Onajon, oyog‘ingiz yaxshimi, sizni Hindistonga olib boraman deb, o‘lguncha qo‘ng‘iroq qildi. Bir so‘z bilan aytganda, farishta yigit edi. Rol o‘ynasa maza qilardi, boshqa narsa uni qiziqtirmasdi. Hozir o‘ylasam, doim shoshilib yuradigan bola bo‘lgan ekan, hech ham tinch o‘tirganini ko‘rmaganman.
Bir kuni gastrolda kalish kiyib olgandim, to‘yxonaga kirishdan avval loy tekkan ekan, suv olib kelib kalishimni artib ketdi. Qo‘y, desam ham yo‘q, kalishingiz loy bo‘lib qolibdi, artib qo‘yaman, degan.
Lekin sahnada juda terlab ketganidan sovuq narsa ko‘p ichardi. Yomon yo‘talyapsan, o‘zingni tekshirtir deb men ham, Rahmon ham, Fotima opa ham ko‘p urishardik. Baribir quloq solmasdi, 10 talab muzqaymoq yerdi. Bilmadim nima sabab, shu yigitni dard olib ketdi.
To‘rt oy umrim qolibdi, hech kimga aytmang deb Adhamga aytgan ekan, bizga aytmagan. Ko‘rgani boraman Jo‘ra, desam, yo‘q, tuzalib o‘zim sizni ko‘rishga boraman dedi. Meni ko‘rsangiz ko‘nglingiz buziladi, deb odamni ayardi. Navqiron yoshida ketdi, deydi aktrisa.
Fotima Nazarova, aktrisa:
— Jo‘radek inson hayotimda uchraydimi yo‘qmi endi bilmayman. U g‘iybat qilmasdi, birovning sirini sotmasdi. Kimning nima sirini bilsa, o‘zi bilan olib ketdi. Shunaqa ishonchli odam edi. Menga o‘xshab uysiz edi, birovning dardini eshitardi, lekin o‘zinikini doston qilmasdi. Besh oy kasalxonada yotibdi. Bir kun Jo‘ra, qayerdasiz, yo‘q bo‘lib ketdingiz deb telefon qilsam, opa, kasalxonadaman dedi. Nega aytmadingiz desam, ha tuzalib ketaman-da, chiqaman deb qo‘ydi. Shu bilan 4-5 oy o‘tib ketdi, dedi u.
Rahmonali Suropov, jamoa asoschisi:
— Kasaling nima ayt desam, doktorlar bilmayapti, dedi. Ko‘p terlayapman, hansirab qolyapman, lekin yuragim soppa-sog‘ chiqyapti. Butun suyaklarim qaqshab og‘riydi, derdi.
Qarab turardik, 1 kg muzqaymoqni 8-10 daqiqada yeb tashlardi. Konditsionerning tagida uzoq vaqt turardi. Mumkinmas, unday qilma der edik. Shundan suyaklari shamollagan bo‘lsa kerak, deydi aktyor.
Izoh (0)