Gollivudning eng mashhur oilaviy sarguzasht franshizalaridan biri “Muzeydagi tun” filmi remeyk tarzida qaytmoqda. Yangi loyiha ustida Disney studiyasi ish olib bormoqda. Filmning syujet tafsilotlari hozircha oshkor etilmagan bo‘lsa-da, manbalarga ko‘ra, kartina butunlay yangi hikoyani taqdim etadi, biroq avvalgilaridek jonlanadigan eksponatlar g‘oyasi saqlanib qoladi.
Yangi film ssenariysi ustida Tripper Klensi ishlamoqda. Prodyuserlikni esa asl trilogiyani yaratgan rejissyor Shon Levi hamda Den Levin bajaradi. Loyiha Disney kompaniyasiga tegishli bo‘lgan 20th Century Studios tomonidan suratga olinadi. Rejissyor nomi hozircha ma’lum emas, biroq film 2026-yil oxiriga qadar prokatga chiqishi kutilmoqda.
Taniqli amerikalik yozuvchi Milan Trenekning kitobiga asoslangan “Muzeydagi tun” ilk bor 2006-yilda katta ekranlarga chiqqan. Unda Ben Stiller ijro etgan tungi qo‘riqchi xarakteri eksponatlar bilan to‘la, sirli muzeyda kechayotgan sehrli sarguzashtlarga aralashib qoladi. Filmda Robin Uilyams, Emi Adams, Ouen Uilson kabi aktyorlar ham qatnashgan.
Filmning ilk qismi global miqyosda 574 million dollar daromad keltirgan. Uning davomi “Muzeydagi tun: Smitson institutidagi jang” (2009) 413 million dollar, “Muzeydagi tun: qabr sirlari” (2014) esa 363 million dollar ishlab topgan.
2019-yilda Disney tomonidan Fox studiyasining xarid qilinishi ortidan franshiza animatsion formatga o‘tkazildi. 2022-yilda “Muzeydagi tun: Kahunra yana jangda” animatsion filmi Disney+ platformasida namoyish etildi.
Yangi remeykda aktyor Ben Stiller ishtirok etadimi yoki yo‘qmi, hozircha noma’lum. Biroq muxlislar uni hech bo‘lmaganda epizodik sahnada ko‘rishga umid bildirmoqda.
Izoh (0)