Og‘ir yoki davolab bo‘lmaydigan kasallik nafaqat bemor uchun, balki uning yaqinlariga ham sinovdir. O‘lim bilan yuzma-yuz kelish haqidagi mavzuga bag‘ishlangan ko‘plab ta’sirli filmlar mavjud. Bunday loyihalarni suratga olishda ayrim rejissyor va ssenariy mualliflari vaziyatni kulgi va hazil bilan yengish mumkin, degan g‘oyaga amal qiladi. Ana shunda kulgi orqali taqdir zarbalariga javob bergan va hatto eng og‘ir pallalarda ham tabassum qilishni unutmagan qahramonlar dunyoga keladi.
“Opajon Betti”
Rene Zellveger, Morgan Friman va Kris Rok ishtirokidagi “Opajon Betti” filmi amerikacha komediya bo‘lib, syujet markazida kamyob ruhiy kasallikka chalingan ayol turadi. Qahramonning holati jiddiy bo‘lishiga qaramay, film komediya yo‘sinida rivojlanadi va baxtli yakun topadi. Loyiha kassabop bo‘lmagan bo‘lsa-da, bir qator nufuzli mukofotlarga, jumladan, bosh rol uchun “Oltin globus” sovriniga sazovor bo‘lgan.
Syujetga ko‘ra, Betti ismli ayol oddiygina ofitsiant bo‘ladi va tibbiyot sohasiga oid serial ko‘rishni yaxshi ko‘radi. Kunlarning birida u turmush o‘rtog‘ining mashinasiga minadi, ammo avtomobil ichida noqonuniy moddalar yashirilganidan bexabar bo‘ladi. Eri o‘sha moddalardan qutulolmagani uchun ikki qotil tomonidan ko‘z o‘ngida o‘ldiriladi. Bu dahshatli voqeadan so‘ng Betti o‘zini serialdagi hamshira deb o‘ylay boshlaydi va serialdagi shifokorga go‘yoki oshiq bo‘ladi. So‘ng Betti uni izlab yo‘lga chiqadi, ortidan esa ikki qotil ketadi.
“Sinfxona qarshisida”
Rejissyor Piter Verner tomonidan suratga olingan “Sinfxona qarshisida” filmi bolalikdagi orzusiga erishgan amerikalik o‘qituvchi Bred Koen haqidagi hayotiy dramadir. Bred tug‘ilganidan Turett sindromi bilan yashaydi, lekin shunga qaramay, o‘qituvchi bo‘lishni maqsad qiladi. Bosh rol ijrochisi Jeyms Volk uchun bu film ilk yirik loyiha bo‘lgan.
Avvaliga 12 yoshli Bred sinfdoshlari tomonidan masxaralanadi. Maktab direktori esa unga ishonch bildiradi va Bred o‘qituvchi bo‘lishga qaror qiladi. Voyaga yetgach, ishga kirish qiyin kechadi, topgach ham o‘quvchilarning ota-onalari uning kasalligidan xavotir bildirib, o‘rniga boshqa muallim talab qiladi. Ammo u bolalar qalbini zabt etib, “Yilning eng yaxshi o‘qituvchisi”ga aylanadi.
“Eng muhimi — qo‘rqmaslik!”
Nikol Kassel rejissyorligidagi bu komediya hayotning o‘tkinchiligi haqida chuqur o‘yga chorlaydi va muammolarga kulgi bilan yondashishga chaqiradi. Bosh rollarda Keyt Hadson va Gael Garsiya Bernal ishtirok etishgan.
Doim quvnoq yuradigan Marli bir kuni unga saraton tashxisi qo‘yilganini bilib qoladi. Yashab ketishga umid kam bo‘lsa-da, u hayot tarzini o‘zgartirishni istamaydi. Operatsiya vaqtida behush bo‘lgan Marli “osmon”ga uchadi va u yerda xudo (Vupi Goldberg) unga uchta tilak tilash imkonini beradi. So‘ng uning tilaklari asta-sekin amalga oshadi.
Bu vaqtda Marli o‘zining shifokori Julian Goldshteynni yoqtirib qoladi. Jiddiy munosabatdan yiroq bo‘lgan qiz bu safar yuragiga quloq solishga qaror qiladi.
“1+1”
2011-yilda chiqqan “1+1” filmi komedik drama janrida bo‘lib, tez orada butun dunyoda mashhurlikka erishgan. Filmning muvaffaqiyati aktyorlar Fransua Klize va Omar Sining hayotiy obrazlariga bog‘liq.
Boy, lekin nogironlar aravachasida yashovchi Filipp o‘ziga qarovchi sifatida o‘tmishda jinoyatchi bo‘lgan qora tanli Drissni yollaydi. Dastlab Driss ish beruvchilardan faqat rad javobini olib, davlatdan ishsizlik nafaqasini olmoqchi bo‘ladi. Ammo uning Filippga bo‘lgan beparvo, ochiq munosabati Filippga yoqadi. Tez orada ular chin do‘stga aylanishadi va bir-birining hayotiga ijobiy ta’sir o‘tkazishadi.
Film Fransiya kinosi tarixida eng daromadli kartinalardan biri bo‘lgan va 400 million dollardan ortiq daromad keltirgan. Foydaning bir qismi falajlarga yordam beruvchi Simon de Cyrene fondiga yo‘naltirilgan.
“Ezgulik asoslari”
Rob Barnett tomonidan suratga olingan bu komedik drama turli fojia sabab hayotidagi yo‘lini yo‘qotgan yozuvchi Ben va mushak distrofiyasi bilan yashovchi o‘spirin Trevor haqidagi hikoya qiladi.
Farzandini yo‘qotgan Ben parvarish kursini bitirib, ish izlaydi. Uning birinchi bemori nogironlik aravachasida harakatlanadigan, dunyoga g‘azab bilan qaraydigan Trevor bo‘ladi. Bolalikda otasi uni tashlab ketgan va u hayotdan umid uzgan bo‘ladi. Ammo Ben bilan o‘rtasida ishonch paydo bo‘ladi. so‘ng ular birgalikda safarga chiqishadi: ular yo‘lda yangi tanishlar, hayot saboqlarga duch keladi.
Film ilk bor 2016-yil Sandens kinofestivalida namoyish etilgan. Tanqidchilarning baholari turlicha bo‘lgan bo‘lsa-da, film striming platformalar orqali tomoshabinlarga havola etilgan.
Izoh (0)