Janubiy koreyalik aktyor Li Byon Xon amerikalik boshlovchi Jimmi Fellonning The Tonight Show dasturida mehmon bo‘lib, oilasida yuz bergan qiziqarli holatni aytib berdi.
Aktyorning o‘g‘li otasining “Kalmar o‘yini” serialida suratga tushganini sinfdoshlaridan bilib qolgan va serialni ko‘rgach, otasiga bo‘lgan munosabatini o‘zgartirgan.
Li Byon Xonning so‘zlariga qaraganda, bir kuni maktabdan xafa bo‘lib qaytgan 10 yoshar o‘g‘li undan: “Nega siz bunchalar yovuz odamsiz?” deb so‘ragan. U buni serialdagi otasining qahramoni — niqobli boshqaruvchining juda ko‘p odamni o‘ldirgani bilan izohlagan. Aktyor bundan hayron qolgan bo‘lsa-da, vaziyatni tushuntirishga harakat qilgan:
“Bu faqat aktyorlik ishi. Men bu obrazni ijro etganman. Bu mening aslim emas” degan, biroq bola bunga ishonmagan.
Ma’lumot uchun, “Kalmar o‘yini” Netflix platformasida 2021-yilda chiqib, global miqyosda katta shov-shuvga sabab bo‘lgan. Serial 94 mamlakatda trendga chiqqan va birinchi oyda 111 milliondan ortiq tomoshabinni jalb qilgan.
Joriy yil 27-iyunda esa “Kalmar o‘yini”ning yakuniy uchinchi mavsumi katta shov-shuv bilan taqdim etildi. Premyeradan so‘ng atigi uch kun ichida yangi fasl 60,1 million marta tomosha qilindi. Bu ko‘rsatkich uni qisqa muddat ichida eng ko‘p ko‘rilgan serialga aylantirdi.
Serialning ikkinchi mavsumi ham o‘z vaqtida yuqori natijalarga erishgan — premyeradan keyingi dastlabki to‘rt kun ichida 68 million marta ko‘rilgan va ilk haftasidayoq reytingda birinchi o‘ringa chiqqan. Bu natija hatto ilgari yetakchilik qilgan “Uenzdey” serialidan (50,1 million ko‘rish) ham yuqori bo‘lgan edi.
Izoh (0)