Qozog‘iston Oliy sudi mamlakat fuqarosiga ekologiya qonunchiligini buzganligi uchun 73 million dollar (37 milliard tenge) miqdorida misli ko‘rilmagan jarima qo‘llash to‘g‘risidagi ishni ko‘rib chiqadi. Bu haqda Tengrinews xabar berdi.
Oliy sud jarayoni yaqin kunlarda boshlanib, shov-shuvli ishga nuqta qo‘yishi kutilmoqda. Ma’lum qilinishicha, “Oxygenator” MCHJning Atirau viloyati Ekologiya boshqarmasiga nisbatan kassatsiya shikoyati bo‘yicha sud majlisi 17-iyunga belgilangan. Kompaniya tekshiruv dalolatnomasi va 2023-yil 12-sentyabrdagi qoidabuzarliklarni bartaraf etish to‘g‘risidagi buyruqqa e’tiroz bildirmoqda.
2023-yilda atiraulik tadbirkor ekologik qonunlarni buzgani uchun misli ko‘rilmagan jarima to‘lashga majbur bo‘lgan. 42 yoshli Murat Niyazov neft chiqindilarini utilizatsiya qiluvchi kichik biznes egasi hisoblanadi.
Birinchi sudi “Oxygenator” MCHJ xavfli neft chiqindilarini tegishli ruxsatnomasiz yig‘ib, ekologiya qonunchiligini buzgan deb topgan. Oqibatda kompaniya 328-modda “Atrof-muhitga yo‘l qo‘yiladigan antropogen ta’sir ko‘rsatish standartlarini buzish” bo‘yicha 73 million dollar (37,4 milliard tenge) miqdorida jarimaga tortilgan.
Jarima miqdoriga izoh berar ekan, erkak yiliga ko‘pi bilan 19,5 ming dollar (10 million tenge) to‘lashi mumkinligini aytgan. 73 million dollarni to‘lash uchun, taxminiy hisob-kitoblarga ko‘ra, unga 3700 yil kerak bo‘ladi.
Avvalroq Ekologiya va tabiiy resurslar vazirligi 2023-yilda o‘tkazilgan tekshiruvda Atirau viloyati ekologlari jiddiy qoidabuzarlikni aniqlaganini ma’lum qilgan edi. 2022-yildan buyon korxonalardan birida ochiq maydonlarda 13 ming tonnadan ortiq zararli neft va boshqa chiqindilar to‘plangan. Tekshiruv tabiatni muhofaza qilish prokuraturasi talabiga binoan amalga oshirilgan.
“2022-yildan bugungi kunga qadar to‘planib qolgan chiqindilar utilizatsiya qilinmagan. Aniqlangan ekologik me’yorlarning buzilishi munosabati bilan “Oxygenator” MCHJga nisbatan ma’muriy jarimalar qo‘llanildi. Ularning bir qismini kompaniya tan olgan va ixtiyoriy ravishda to‘lagan. Aniqlangan asosiy qoidabuzarlik ekologik ruxsatnomasiz xavfli chiqindilarni to‘plash bo‘lib, buning uchun birinchi instansiya sudi tomonidan 37,4 milliard tenge miqdorida ma’muriy jarima qo‘llanildi”, deya tasdiqlagan Ekologiya vazirligi.
Jarima jazosini tayinlashda sud atrof-muhitga salbiy ta’sir ko‘rsatganlik uchun to‘lov stavkalarini ifloslantiruvchi moddalarning ortiqcha miqdoriga nisbatan foizlarda hisoblab chiqqan. Bu huquqbuzarlik sodir etilgan paytda amalda bo‘lgan eng kam ish haqi miqdorini hisobga olgan holda 37 495 296 527,4 tengeni tashkil etgan.
Izoh (0)