Buxoro viloyatining Jondor tumanida tug‘ilgan 38 yoshli ayol TikTok’da Matluba nomi bilan profil ochib, odamlarga o‘zini bosh miya saratoni va jigar sirrozi bilan kurashayotgan bemor sifatida ko‘rsatib, odamlarning xayriya pullarini “yeb kelgani” ma’lum bo‘ldi. Jinoyat ishlari bo‘yicha Jondor tuman sudida ayolning xatti-harakatiga qonuniy baho berildi.
Sud hujjatlarida yozilishicha, ayol o‘zgalarning mulkini talon-toroj qilish maqsadida 2021-yilning boshlarida TikTok ijtimoiy tarmog‘ida “Matluba1986” nomli profil ochib, ushbu manzil orqali o‘zining bosh miya saratoni va jigar sirrozi kasalligiga chalingani haqida yolg‘on videomurojaatlar qilgan. Davolanishi va boshqa xarajatlari uchun tarmoq kuzatuvchilaridan ehson sifatida pul olishini aytib, plastik kartochkalari raqamlarini e’lon qilgan.
U 2023-yilning noyabr oyida Maqsad Navro‘zovadan 5 million so‘m, Shohista Ortiqovadan 1 million so‘m, Zulfizar O‘ktamovadan 1,5 million so‘m pul olgan.
Sud muhokamasida sudlanuvchi tariqasida so‘roq qilingan ayol aybiga to‘liq iqrorlik bildirib, bunday xatti-harakatiga oilaviy ahvolining og‘irligini sabab qilib ko‘rsatgan.
2021-yil boshlaridan buyon oila a’zolarim bilan birga Rossiya davlatiga ishlash maqsadida borib kelaman. Oxirgi marta 2022-yilning oxirlarida Rossiyaga ketib, 2023-yilning taxminan noyabr oylarida qaytib kelib, hozirgi kunga qadar uyimdaman.
2021-yilda Rossiya davlatida ishlab yurgan vaqtimda iqtisodiy sharoitim og‘ir bo‘lgani sababli turli ishlarda ishladim. 2019-yil oxirlaridan o‘zimga tegishli telefonda TikTok ijtimoiy tarmog‘idan “Matluba” nomli profil ochib, foydalanib keldim. 2021-yilning boshlarida iqtisodiy sharoitim og‘ir bo‘lgani sababli pulga muhtoj bo‘lib qoldim.
Shundan so‘ng TikTok’da o‘zimni bosh miya saratoni va jigar sirrozi kasalligiga chalingan ayol sifatida ko‘rsatib, jonli efirlar qildim va odamlardan ehson puli so‘ray boshladim. 2024-yilning aprel oyiga qadar TikTok’dan kartamga turli miqdordagi pullarni tashlatib, uni shaxsiy xarajatlarim uchun sarflab keldim, deydi voqea haqida gapirgan sudlanuvchi.
Ayolning tan olishicha, u umuman kasallikka chalinmagan bo‘lgan.
Men Matlubanining videolavhalaridan uning iqtisodiy sharoiti og‘ir ekanini bilgan edim. O‘sha vaqtda Matluba TikTok ijtimoiy tarmog‘ida jonli efir qilgan vaqtlari o‘zining bosh miya saratoni kasalligiga chalinganini aytib, jonli efirda uni kuzatuvchilardan ehson so‘rashni boshlagandi.
Mening onam ham saraton kasalligiga chalinib vafot etgani sababli Matlubaga rahmim kelgan edi va unga moddiy jihatdan yordam berishga qaror qildim. Matluba TikTok’da qilgan jonli efirlarida o‘zining plastik karta raqamlarini yozib qo‘yar edi. Men shundan keyin Matlubaning plastik kartasiga turli miqdorda pul o‘tkazib berishni boshladim. Bo‘lib-bo‘lib unga 5 million so‘m miqdorida pul berdim.
2024-yilning aprel oyi boshlarida Matluba TikTok’dagi jonli efirida qornining rasmini ham ko‘rsatib, jigar sirrozi kasalligiga chalinganini aytib, kuzatuvchilardan ehson so‘rashni davom ettirdi. Keyin bilsak, u qorni ustiga doka qo‘yib, “izolenta” yopishtirgan ekan. Surishtirsam, aslida, u homilador ekani ma’lum bo‘ldi, deydi sudda so‘z olgan jabrlanuvchilardan biri.
Sud ayolni Jinoyat kodeksining 168-moddasi 3-qismining “b” va “g” bandlari (takroran yoki xavfli retsidivist tomonidan axborot tizimidan, shu jumladan, axborot texnologiyalaridan foydalanib sodir etilgan firibgarlik) bilan aybli deb topib, unga nisbatan shu modda bilan Jinoyat kodeksining 57-moddasini qo‘lladi va kunning kech soat 22:00 dan ertalab soat 07:00 gacha yashash joyidan chiqishi cheklangan holda, 5 yil ozodlikni cheklash jazosi tayinladi.
Avvalroq Buxoroda 16 yoshli bola o‘zgalar nomiga kredit olib, onlayn qimorga tikib yuborgani, Toshkentda fuqaroni Yaponiyaga ishga jo‘natish evaziga 7,4 ming dollar olgan shaxs ushlangani xabar berilgandi.
Izoh (0)