O‘zbekistonda 2024-yilning 7-dekabridan 8-dekabr kuniga o‘tar kechasi yog‘gan birinchi qor izg‘irin sovuqni boshlab kelish barobarida, mavjud metan zapravkalar faoliyatiga cheklov o‘rnatilishiga ham sabab bo‘ldi. Bu esa, o‘z navbatida, minglab haydovchilarning soatlab ko‘chada o‘tirishiga, yonilg‘isiz qolib ketishiga sabab bo‘lmoqda. “Daryo” jurnalisti Toshkent shahridagi metan zapravkalarda navbat kutayotgan haydovchilarga mikrofon tutdi.
O‘zini Nodir deb tanishtirgan haydovchining aytishicha, uning tirikchiligi aynan shu metan gaz bilan bog‘liq bo‘lgani sababli zapravkaga kirish uchun ikki soat navbat kutgan.
Tirikchilik shundan, gaz bo‘lmasa bo‘lmaydi. Benzin yo‘q. Aynan Ai-80 benzini yo‘q, deydi u.
Spark haydovchisining aytishicha, uning avtomobili faqat gazda yuradi.
Mashinam benzinda yurmaydi, shu sabab gazda navbatda turdim. Tirikchiligim aynan shundan, deydi Spark avtomobili egasi.
Lacetti haydovchisi hali qish boshlanmasidan shunday muammoga duch kelish ularni o‘ylantirib qo‘yganini aytmoqda.
Boshlanishi shunday bo‘lyapti, oxiri haqida hali o‘ylamadik, deydi suhbatdosh.
Yana bir suhbatdosh bu holat har yili takrorlanishini, bunga o‘rganish kerakligini ta’kidlamoqda.
O‘zbek xalqi chidamli xalq-ku. O‘rganishimiz kerak endi, deydi u.
Suhbatdosh, shuningdek, rahbarlar bu haqda bosh qotirayotgani va muammoning yechilishiga umid qilayotganini aytdi.
Muammoni hal qilish uchun Xitoy yoki Rossiyaga gazni sotmaslik, avvalo, aholini ta’minlash kerak deb o‘ylayman, deydi nafaqadagi haydovchilardan biri.
Yashnobod tumanidagi metan zapravkada ishlovchi ishchining aytishicha, ularga har kuni soat 09:00 dan 15:00 ga qadar faoliyat yuritishga ruxsat berilgan.
Biz 24 soat ishlashga ham tayyormiz, lekin soat 15:00 ga qadar ishlashimiz kerakligi belgilangan. Biroq mashinasining yonilg‘isi tugab o‘chib qolganlar bo‘lsa, ularni navbatsiz kiritib gaz beryapmiz, deydi zapravka ishchisi.
Gaz zapravkada turgan taksi haydovchilaridan birining aytishicha, uning avtomobili kreditga olingan bo‘lib, kun davomida ishlay olsa, belgilangan kredit to‘lovini amalga oshira oladi. Soatlab gaz gapravkada o‘tirish esa unga muammo tug‘diradi.
Izoh (0)