Isroil 10 yil ichida qurol-yarog‘ ishlab chiqarishga 119 mlrd dollar yo‘naltiradi

Isroil kelgusi 10 yil ichida o‘zining qurol-yarog‘ ishlab chiqarish quvvatlarini rivojlantirish maqsadida mudofaa byudjetini 350 mlrd shekelga (119 mlrd dollar) to‘ldiradi. Bu haqda Isroil bosh vaziri Binyamin Netanyaxu ma’lum qildi, deya xabar berdi “TASS”.

“Men qurol-yarog‘ ishlab chiqarish bo‘yicha o‘z quvvatlarimizga sarmoya kiritish haqida farmoyish berdim. Kelgusi o‘n yillikda bu qurollarni mamlakat ichida ishlab chiqarish va xorijiy ta’minotchilarga qaram bo‘lib qolmaslik uchun mudofaa byudjetiga 350 milliard shekel qo‘shamiz”, deya ta’kidladi siyosatchi o‘z idorasi tarqatgan videomurojaatda.

Bundan tashqari, u “bir necha hafta oldin uchuvchisiz uchish apparatlari xavfini bartaraf etish bo‘yicha maxsus loyiha yaratish to‘g‘risida buyruq berganini” eslatib, “bugunning o‘zida bu sohadagi yutuqlar haqida hisobot kutayotganini” qayd etgan.
Aprel oyi oxirida AQSH Isroilga bir sutkada 6 500 tonna qurol va harbiy texnika yuborgani xabar qilingandi. Yuklar ikkita yirik kema va bir nechta yuk samolyotlari orqali tashilgan.
Fransiya 2024-yilda Isroilga qurol yetkazib berish bo‘yicha yetakchilikni qo‘lga kiritdi. Isroil ushbu mamlakatdan qurol sotib olishni to‘xtatishini e’lon qilgan bo‘lsa-da, amalda Fransiya asosiy eksportchi bo‘lib qolgani aniqlandi.
Yevropa Ittifoqi 29-aprel kuni e’lon qilgan hisobotga ko‘ra, Fransiya 2024-yilda Isroilga 362 million yevrolik (424 million dollar) qurol eksporti uchun litsenziya bergan. Ikkinchi o‘rinda Germaniya (198 million dollar) qayd etilgan. Uchinchi o‘rindan Gretsiya (133 million dollar) joy olgan.