O‘zbekistonda joriy yil may oyida yillik inflyatsiya darajasi pasaydi, ammo oylik narxlar keskin ko‘tarildi. Bu haqda Statistika qo‘mitasi sharhida maʼlum qilindi.
Maydagi oylik inflyatsiya darajasi 1,5 foiz bo‘ldi. Bu oyma-oy ko‘rsatkichlarga qaraganda bir yil ichidagi eng yuqori o‘sish hisoblanadi. O‘tgan oyda yillik inflyatsiya darajasi 8,7 foizga pastlagan (aprelda 10,1 foiz edi).
May davomida oziq-ovqat mahsulotlari 0,8 foiz arzonlashgan bo‘lsa, nooziq-ovqat mahsulotlari 1,7 foiz, xizmatlar narxi 5,9 foiz qimmatlashgan.
“Bunday holat ko‘p jihatdan kommunal xizmatlar sohasidagi tariflarni oshirilishi bilan bog‘liq bo‘ldi”, deyiladi qo‘mita sharhida.
Inflyatsiya darajasi Farg‘ona, Xorazm viloyatlari va Qoraqalpog‘istonda yuqori o‘sgan. O‘rtacha ko‘rsatkichdan baland bo‘lgan yillik inflyatsiya Qashqadaryo, Farg‘ona va Xorazm viloyatlari hamda Toshkent shahrida qayd etilgan.
Qo‘mita tahlilida 2025-yil may oyidan boshlab, aholi uchun elektr energiyasi va gaz narxi oshirilganini ham eslab o‘tilgan. Bunda respublika bo‘yicha tok narxi o‘rtacha 18,8 foizga, gaz 39,2 foizga qimmatlashgani keltirilgan. Shu bilan birga, bir oy ichida metan narxi 27 foizga, maishiy isteʼmoldagi suyultirilgan gaz tarifi esa 25 foizga ko‘tarilgan.
May oyida benzin va propan narxlarida 0,1-2,7 foiz oralig‘ida tushish kuzatilgan. Avtomobil transporti xizmatlari 2,4 foizga, temiryo‘l transporti xizmatlari 0,1 foizga qimmatlashgan. Havo transportida yo‘lovchi tashish xizmatlari o‘rtacha 5,4 foizga arzonlashgan.
“Bu O‘zbekiston havo yo‘llarida ichki qatnovlar uchun ekonom klass tariflarining pasayishi bilan bog‘liq bo‘ldi”, deya qayd etilgan sharhda.
O‘tgan oyda mobil aloqa xizmatlari narxi o‘rtacha 2,9 foizga oshdi.
Asosiy turdagi oziq-ovqatlar turkumiga kiruvchi sabzavotlardan bodring 61,1 foiz, pomidor 27,1 foiz arzonlashdi. Karam 14 foizga, kartoshka 1,9 foizga, piyoz narxi 1,2 foizga tushdi. Sabzi esa 15 foiz qimmatlashdi. Shu bilan birga, o‘simlik yog‘i 4 foizga, shakar narxi 2,2 foizga oshdi.
Mol va qo‘y go‘shti narxlari 0,8 foiz, parranda go‘shtida 0,3-0,5 foiz ko‘tarildi. Bundan tashqari, tuxum 4 foiz, guruch 0,5 foiz, xom sut 0,2 foiz arzonlashdi.
Izoh (0)