Rossiya Federatsiyasi kommunistik partiyasi rahbariyati Xanti-Mansi avtonom okrugi dumasi deputati Xolid Tagi-Zadening partiya a’zoligidan chiqarilgani, ammo mandati va okrug dumasidagi fraksiyasi a’zoligini saqlab qolganini bildirdi.
RFKP Markaziy qo‘mitasi raisi o‘rinbosari Yuriy Afoning aytishicha, partiyadan ajralib chiqqan shaxsga Yugra kommunistlari ta’sir o‘tkaza olmaydi.
“U bir necha yil oldin partiya axloqi va intizomini buzgani uchun RFKP safidan chiqarilgan. Biz uni boshqa nomzod sifatida ko‘rsatmaymiz. Va bu uning mintaqaviy bo‘lim nuqtayi nazariga mos kelmaydigan shaxsiy fikri”, dedi Yuriy Afoning.
Davlat Dumasi deputati Mixail Matveyev esa yanada keskinroq fikr bildirgan.
“Provokator partiyadan chiqarib yuborilgan va uning ahmoqona bayonotlari partiyaga hech qanday aloqasi yo‘q. Tagi-Zade buni bejiz aytmaganini hisobga olsak - parlament a’zolari orasida mahalliy xalqlarning tug‘ilishi va o‘limi haqida munozara boshlangandi. Bu butun Rossiyaga hujum, mahalliy aholini muhojirlar bilan almashtirishni oqlashdir. O‘zbeklarning bizning yerimizga bo‘lgan “tarixiy huquqlari”ni asoslashning o‘zi ham kimdir ishlab chiqqan qo‘llanmani eslatadi. FSB bu “yashirin separatist”ga e’tibor qaratishi kerak edi”, deb yozadi Mihail Matveev o‘zining Telegram kanalida.
Bir nechta manbalarning mahalliy OAVga ma’lum qilishicha, Xolid Tagi-Zoda okrug parlamenti majlisidagi mojaroda “o‘zbeklar tarixiy vatani Yugraga qaytishi mumkin” degan gapidan so‘ng mintaqadan shoshilinch jo‘nab ketgan bo‘lishi mumkin.. Siyosiy doiralardagi bir qator manbalarning fikricha, deputat Ozarbayjonga ketgan.
“Tagi-Zade Rossiya hududini tark etgani haqida ma’lumot tarqaldi. Aytishlaricha, u ta’tilga o‘zining tarixiy vatani Ozarbayjonga jo‘nab ketgan”, deydi manba.
“Biroq, yangilik e’lon qilingan paytda buni tasdiqlash imkoni bo‘lmadi. Tagi-Zade 29-may kuni Duma majlisi o‘tkazilganidan beri jurnalistlarning qo‘ng‘iroqlariga javob bermayapti. 2-iyun kuni uning so‘zlarini ko‘rib chiqqan axloq komissiyasi yig‘ilishida ham ishtirok etmagan”, deya yozmoqda ura.ru sayti.
30-may kuni ijtimoiy tarmoqlarda Rossiya Federatsiyasi kommunistik partiyasidan saylangan Xanti-Mansi avtonom okrugi dumasi deputati parlament yig‘ilishida okrugni “o‘zbeklarning tarixiy vatani” sifatida ko‘rish mumkinligini bildirgani haqida videolar tarqaldi.
Ma’lum qilinishicha, Xanti-Mansi avtonom okrugi dumasi majlisida parlament a’zolari o‘rtasida mahalliy xalqlarning tug‘ilishi va o‘limi haqida munozara yuz bergan. Rossiya Federatsiyasi kommunistik partiyasidan saylangan deputat Xolid Tagi-Zade o‘zbekistonlik muhojirlar XMMOga “o‘zlarining tarixiy vataniga” qaytayotganini aytib, hamkasblariga Sibir xonligi tarixini eslatgan.
“Migrantlar ham turli xil bo‘ladi. Masalan, o‘zbeklarga kelsak: Yugra va Tyumen viloyatining bir qismi tarixan Sibir xonligi edi. Ma’lumki, Ko‘chimxon so‘nggi hukmdor bo‘lgan. U esa shayboniylar sulolasiga mansub. Mana shu shayboniylar sulolasi — Buxoro xonligidan chiqqan hukmron o‘zbek sulolasi hisoblanadi. Ehtimol, muhojirlar bu yerga o‘zlarining tarixiy vataniga kelayotgandek kelishayotgandir?”, dedi deputat majlis davomida.
Duma raisi bunga javoban Tagi-Zadening yana bir muhimroq masalaga qaytishini so‘ragan.
Izoh (0)