Efiopiya janubida 22-iyul kuni yuz bergan yer ko‘chkisi oqibatida kamida 50 kishi halok bo‘lgan. Bu haqda Reuters nashri xabar berdi.
Manbada aytilishicha, baxtsiz hodisa Efiopiya janubidagi Gofa tumanida ro‘y bergan. Kuchli yomg‘ir yog‘ishi ortidan tog‘li hududda ko‘plab ko‘chkilar kuzatilgan.
Qutqaruv guruhlari hozirga qadar 50 kishining jasadini loy orasidan olib chiqishgan. Jasadlarni qidirish yana davom ettirilayotgani bildirilgan. Noqulay ob-havo sharoiti tufayli qutqaruv operatsiyasini davom ettirishda qiyinchiliklar yuzaga kelmoqda.
“Kecha tunda kuchli yomg‘ir yog‘di va ko‘chki oqibatida bir qancha fuqarolar halok bo‘ldi. Ularni hali ham qidiryapmiz. Halok bo‘lganlar ko‘p bo‘lishi mumkin”, degan Gofa tumani hukumati vakili Kassahun Abayne.
Xabarda aytilishicha, qurbonlar orasida ayollar, bolalar va mahalliy politsiyachilar ham bor. Halokat yuz bergan Janubiy Efiopiya viloyatida favqulodda holat eʼlon qilingan. Kuchli yog‘ingarchilik sabab ko‘chkilar qaytalanishi mumkinligi eʼlon qilingan.
Efiopiya iqlimni kuzatish agentligi yaqin haftalarda yog‘ingarchilik kuchayishi va daryolar sathi oshishini prognoz qilgan. Bu esa mamlakat janubidagi viloyatlar uchun ogohlantirish signali berishi aytilgan.
Izoh (0)