Toshkentdagi “Anhor park”da rejalashtirilgan “lenta-shou” bekor qilindi. Bu haqda Ekologiya vazirligi xabar berdi.
Ijtimoiy tarmoqlarda 28-iyul kuni ushbu ko‘ngilochar bog‘da osmondan lentalar yog‘ilishi haqida video tarqalgach, holat Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi tomonidan o‘rganildi.
Ma’lum bo‘lishicha, ko‘ngilochar bog‘dagi “Amfiteatr”da “lenta-shou” uyushtirilishi, bunda animatorlar tomonidan lentalarni aylantirib, tomosha ko‘rsatilishi rejalashtirilgan, “osmondan lentalar yog‘ilishi” esa e’tiborni jalb qilish uchun aytilgan.
Bayram tashkilotchilariga bu kabi shoular atrof-muhitning ifloslanishiga sabab bo‘lishi, ekologiya uchun zararli ekanligi tushuntirildi. Natijada shu kuni o‘tkazilishi rejalashtirilgan “lenta-shou” bekor qilindi, deyiladi xabarida.
Vazirlik xiyobonlar, dam olish maskanlari, ko‘ngilochar obyektlar mutasaddilarini yuqoridagi kabi atrof-muhitga zarar keltiradigan shoular o‘tkazmaslikka chaqirdi.
Izoh (0)