Yamanda o‘lim jazosiga hukm qilingan hindistonlik hamshira Nimisha Priya 16-iyul kuni qatl etiladi. Bu haqda BBC xabar berdi.
U 2017-yilda sobiq hamkasbi Talal Abdo Mahdini o‘ldirishda ayblangan. Hamshira jasadni bo‘laklab suv bakiga tashlagan. Priya qatl etilmasligi uchun marhumning oilasi uni afv etishi kerak bo‘ladi. Hamshiraning yaqinlari va uni qo‘llab-quvvatlovchilari Mahdi oilasiga “diyah” (qon to‘lovi) sifatida 1 million dollar taklif qilgan.
Biz hamon ularning afv etishlarini yoki boshqa talab qo‘yishlarini kutmoqdamiz. Biz hali ham uni qutqarishga harakat qilyapmiz, ammo oxir-oqibat Mahdi oilasi rozilik berishi kerak, dedi Nimisha Priyani qutqarish kengashi a’zosi va ijtimoiy faol Babu Jon.
Prokuratura bosh direktori qatl sanasini qamoqxona rasmiylariga yetkazgan. Hindiston tashqi ishlar vazirligi vakili hozirgacha voqea tafsilotlarini aniqlashtirishga urinishayotganini bildirgan. Nimisha Priya 2008-yilda Hindistonning Kerala shtatidan Yamanga hamshira bo‘lib ishlash uchun ketgan. U 2017-yilda Mahdining jasadi topilgandan so‘ng qamoqqa olingan. Hozirda 34 yoshli ayol Yaman poytaxti San’adagi markaziy qamoqxonada saqlanmoqda.
U Mahdiga “haddan tashqari ko‘p tinchlantiruvchi dori” berib, keyin uning tanasini maydalab tashlashda ayblanmoqda. Hamshira mazkur ayblovlarni rad etgan. Sudda ayolning advokati Mahdi unga jismoniy zo‘ravonlik qilgani, pullarini olib qo‘ygani, pasportini tortib olgani va hattoki qurol bilan qo‘rqitgani haqida dalil keltirgan.
Advokatning aytishicha, ayol faqat pasportini qaytarib olish uchun Mahdini behush qilmoqchi bo‘lgan, ammo doza tasodifan oshib ketgan. 2020-yilda mahalliy sud uni o‘lim jazosiga hukm qilgan. Hamshiraning oilasi Yaman Oliy sudiga apellyatsiya bergan, ammo 2023-yilda ularning shikoyati rad etilgan. Yanvar oyi boshida husiylarning Oliy siyosiy kengashi raisi Mahdi al-Mashat ayolning qatl etilishini tasdiqlagan.
Izoh (0)