Pensiya jamg‘armasi ro‘yxatidagi pensionerlar soni 4,2 mln nafarga yetdi. Bu haqda jamg‘arma iyun oyidagi pensiya to‘lovlari to‘g‘risidagi eʼlonida maʼlum qildi.
Qayd etilishicha, bank kartasi orqali pensiya oluvchilar soni 84 foizni tashkil etmoqda.
“Pensiya jamg‘armasi tomonidan joriy yil iyun oyi to‘lov ro‘yxatlariga kiritilgan 4,2 mln nafar pensiya oluvchilar uchun talab etilgan mablag‘lar tijorat banklariga moliyalashtirilib berildi. O‘z navbatida pensiya to‘lovlarini naqd pulsiz shaklda oluvchi 3,5 mln nafar (yoki jami oluvchilarning 84 foizi) fuqarolarning bank kartalariga mablag‘lar to‘liq yuklab berilishi taʼminlandi”, deya xabar bergan jamg‘arma.
Lekin bu raqam respublikadagi jami pensionerlar sonini ifodalamaydi. “Daryo” manbasining maʼlum qilishicha, huquqni muhofaza qiluvchi organlar tuzilmalaridan pensiyaga chiqqanlar hisobi va to‘lovlari alohida yuritiladi. U tashkilotlar quyidagilar:
- Prezident davlat xavfsizlik xizmati;
- Davlat xavfsizlik xizmati;
- Mudofaa vazirligi;
- Ichki ishlar vazirligi;
- Bosh prokuraturasi;
- Favqulodda vaziyatlar vazirligi;
- Milliy gvardiyasi;
- Bojxona qo‘mitasi;
- Konstitutsiyaviy sud;
- Oliy sud;
- Sudyalar oliy kengashi.
“Daryo” mazkur tashkilotlardan bir nechtasiga o‘z tuzilmalarida ishlab, pensiyaga chiqqan va hozir pul olayotgan pensionerlar sonini ochiqlashni so‘rab, murojaat qildi. Biroq faqatgina Mudofaa vazirligi tuzilmalarida ishlagan va hozirda pensiya olayotganlar soni oshkor etildi.
“Mudofaa vazirligi tuzilmalarida 27 ming nafar pensioner pensiya olmoqda”, deydi vazirlik Faxriylar kengashi raisi Abubakir Navro‘zov.
Ichki ishlar vazirligi matbuot kotibi Shohruh G‘iyosov esa pensionerlar soni oshkor etilmasligini maʼlum qildi.
“Soni yopiq axborot ekan. Sababi pensiyaga chiqsa, qurolli kuchlar rezerviga o‘tkazilar ekan. U maʼlumot esa maxfiy”, deya javob berdi vazirlik axborot xizmati rahbari.
“Daryo” manbasining aytishicha, huquqni muhofaza qiluvchi organlarda ishlab, pensiyaga chiqadiganlar pensiyalarini hisoblash tartibi jamg‘armanikidan farq qiladi. Yaʼni ularga yuqoriroq pensiya tayinlanadi.
Milliy statistika qo‘mitasi maʼlumotlariga ko‘ra, 2025-yil 1-aprelda O‘zbekiston aholisi 37,7 million kishiga yetgan.
Izoh (0)