Toshkentda styuardessaga tegajog‘lik qilgan yo‘lovchi erkak uch sutkaga qamaldi. Bu haqda Toshkent shahar sudlari “Daryo”ga xabar berdi.
Ma’lum bo‘lishicha, hodisa Vladivostok—Toshkent yo‘nalishi bo‘yicha parvoz vaqtida sodir bo‘lgan. Mast erkak samolyot salonida chekmoqchi bo‘lganida bort kuzatuvchisi samolyotda chekish mumkin emasligini tushuntirgan.
Shu vaqt erkak nomaqbul xatti-harakatlar sodir etib, ayolning ko‘kragidan ushlagan va unga haqoratli so‘zlar aytgan.
Holat jinoyat ishlari bo‘yicha Sergeli tuman sudi tomonidan ko‘rib chiqildi. 1982-yilda tug‘ilgan erkak Ma’muriy javobgarlik to‘g‘risidagi kodeksning 41-1-moddasi 1-qismida nazarda tutilgan huquqbuzarlikni sodir etganlikda aybli deb topilib, unga 3 sutka qamoq jazosi tayinlandi.
O‘zbekistonda 4 oyda zo‘ravonlikka uchragan 2 317 nafar xotin-qizga yordam ko‘rsatildi.
Toshkent viloyati Nurafshon shahrida 60 yoshli erkak 6 yoshli qo‘shnisiga tegajog‘lik qilganlikda ayblanayotgani haqida xabar berilgandi. Shuningdek, Andijonda maktab direktori o‘rinbosari o‘quvchi qizlarga tegajog‘lik qilayotgani aytilgan, Toshkentda metro vagonida notanish qizga shilqimlik qilgan erkak besh sutkaga qamalgan edi.
Toshkent shahar Yunusobod tumanida o‘qituvchi erkak sobiq o‘quvchisini do‘stining oldida haqoratlab, tegajog‘lik qilgan edi.
Shuningdek, Toshkent shahrining Yakkasaroy tumanidagi rassomchilik maktabi o‘qituvchisi dars paytida o‘quvchi qizga shilqimlik qilgani uchun 5 sutkaga qamalgandi.
Izoh (0)