Amerika Qo‘shma Shtatlari Eron yadro dasturi davom etayotganini sabab qilib, Tehronga qarshi yangi sanksiyalarni e’lon qildi. Bu haqda 12-may kuni AQSH davlat kotibi Marko Rubio ma’lum qildi, deb xabar bermoqda Deutsche Welle nashri.
Ummonda ikki davlatning yuqori martabali vakillari o‘rtasidagi muzokaralarning navbatdagi raundi yakunlangach, AQSH Davlat departamenti rahbari Eron yadro dasturini kengaytirishda davom etayotganini ma’lum qildi.
“Tehron ikki tomonlama foydalanish uchun ilmiy-tadqiqot va tajriba-konstruktorlik faoliyatini olib bormoqda. Ular yadro quroli va uni yetkazib berish tizimlari bilan bog‘liq,” deya ta’kidladi Rubio.
AQSH ma’lumotlariga ko‘ra, cheklovlar Eronning SPND harbiy tadqiqot tashkiloti bilan aloqalarni saqlab kelayotgan Fuya Pars Prospective Technologists kompaniyasiga, shuningdek, yadro dasturiga aloqador uch nafar Eron fuqarosiga qaratilgan.
Eron va AQSH rasmiylari 11-may kuni Ummonda Tehronning yadroviy dasturi bo‘yicha to‘rtinchi raund muzokaralar o‘tkazdi. Uchrashuvda Tehrondan tashqi ishlar vaziri Abbos Arag‘chi, Vashingtondan esa AQSH prezidentining maxsus elchisi Stiven Uitkoff ishtirok etdi.
Izoh (0)