Parijdagi Yelisey maydonida erkak avtomobilini “Pari Sen-Jermen” (“PSJ”) klubi muxlislari ustiga haydadi. Bu haqda Le Parisien xabar berdi.
Muxlislar o‘z jamoasining Chempionlar Ligasi finaliga chiqqanini nishonlayotgan bo‘lgan. Hodisa oqibatida uch kishi tan jarohati olgan, bir kishi og‘ir ahvolda shoshilinch yordam bo‘limiga yetkazilgan. Avtomobilni o‘nlab muxlislar o‘rab olib, uning oynalarini sindirgan, toshlar otgan. Shundan so‘ng avtomobil yonib ketgan holda topilgan.
Xuddi shu hududda bir nechta muxlislar politsiyachilarni toshbo‘ron qilgan. Shuningdek, ularga qarshi pirotexnika vositalaridan foydalangan. Bundan tashqari, muxlislar bir nechta mashina va do‘konlarga zarar yetkazgan. Politsiya ko‘zdan yosh oqizuvchi gaz ishlatgan. Natijada 43 nafar tartibsizlik ishtirokchisi qo‘lga olingan.
“PSJ” 8-mayga o‘tar kechasi Londonning “Arsenal” klubi ustidan g‘alaba qozondi. Jamoa Chempionlar Ligasi yarim finalida 2:1 hisobida g‘oliblikni qo‘lga kiritdi. Ikkala uchrashuv natijasiga ko‘ra (3:1) klub turnir finaliga chiqdi va u yerda Milanning “Inter” klubi bilan o‘ynaydi.
Izoh (0)