Angliya Premyer Ligasining 31-turidagi “Nyukasl”ga qarshi o‘yinda “Lester” bosh murabbiyi Rud van Nistelroy 2009-yilda tug‘ilgan Jeremi Mongani maydonga tushirdi. Hujumchi 15 yosh-u 271 kunligida debyutini amalga oshirdi hamda Angliya chempionati tarixida maydonga tushgan ikkinchi eng yosh futbolchiga aylandi.
Monga o‘yinning 74-daqiqasida zaxiradan maydonga tushdi. Bahsdan keyin “Lester” ustozi Rud van Nistelroy futbolchining harakatlarini yuqori baholadi:
U ajoyib futbolchi, tezligi yuqori. Jeremini fantastik iste’dod egasi deb bilaman. Monga o‘z mehnati bilan shu darajaga erishdi. Umid qilamanki, bu natija — u uchun hali boshlanishi, deydi murabbiy.
Shu tariqa, Jeremi Angliya chempionati tarixida maydonga tushgan ikkinchi eng yosh futbolchi bo‘ldi. Birinchi o‘rin “Arsenal” futbolchisi Itan Nvanieriga tegishli — u 2022-yil sentyabr oyida “Brentford”ga qarshi o‘yinda 15 yosh-u 181 kunlik chog‘ida debyut qilgandi.
APL tarixidagi eng yosh debyutantlar ro‘yxatida yana quyidagi futbolchilar bor:
Harvi Elliot, Metyu Briggs (ikkalasi ham “Fulhem”), Izzi Braun (“Vest Bromvich”), Aaron Lennon (“Lids”), Jozef Bakster (“Everton”), Gari MakSheffri (“Koventri”), Ris Oksford (“Vest Hem”), Jek Robinson (“Liverpul”) va Jek Uilshir (“Arsenal”).
Izoh (0)