“Oybola va uning do‘stlari” animatsion seriali Rossiyada ishlab chiqilgan bo‘lib, birinchi marta 2006-yildan efirga uzatilgan. Multfilm yosh tomoshabinlarga mehribonlik, do‘stlik, halollik va boshqa muhim insoniy qadriyatlarni o‘rgatishga qaratilgan.
Asosiy qahramon Oybola (Luntik) Oyda tug‘ilgan va tasodifan Yerga tushib qolgan o‘zga sayyoralikdir. U yangi dunyo — Yer sayyorasida yashashni o‘rganadi, turli hasharotlar bilan do‘stlashadi. Hozirda Oybola millionlab bolalarning sevimli qahramoniga aylangan.
Ammo hech o‘ylab ko‘rganmisiz, nega bosh qahramon aynan och binafsharangda tasvirlangan? Bir qarashda bu oddiy detaldek tuyulishi mumkin, ammo uning ortida chuqur o‘ylangan mantiqiy sabablar yotadi.
Eng mashhur farazlardan biri — bu Oybolaning Yer sayyorasiga begona jonzot ekanligi. Uning rangi bizdagi barcha jonzot va maxluqotlardan farq qilishi lozim edi. Biroz pushti aralash binafsharang qahramonning o‘zga olamdan kelganini bildiradi.
Ikkinchi nazariya esa psixologik talqinda tushuntiriladi. Binafsharang va pushti iliqlik, mehr-muhabbat va noziklikni anglatadi. Oybola ham mehribonlik va g‘amxo‘rlik timsolidir. Bu rang bolalar va kattalarda unga nisbatan ishonch uyg‘otadi. Psixologlarning fikricha, pushti insonni xavfsizlik hissi bilan ta’minlaydi, shu sababli ham bolalar multfilmi qahramoni uchun juda mos keladi.
Izoh (0)