Temu O‘zbekistonda 46 mlrd so‘m soliq to‘lashi kerak. Bu haqda AOKAda bo‘lib o‘tgan matbuot anjumanida soliq qo‘mitasi raisining birinchi o‘rinbosari Mubin Mirzayev maʼlum qildi.
Mubin Mirzayevning aytishicha, hozirgi kunda ko‘plab mamlakatlarda eng katta masala — marketpleys yoki elektron savdo tizimlarini soliqqa tortish bo‘lib turibdi.
“Biz internet orqali savdo qilish tizimini to‘liq tahlil qildik. Tahlillar natijasida juda ko‘plab elektron savdo qiladigan tashkilotlar soliq to‘lamaslik holatlarini aniqladi. Nafaqat Temu, balki Wildberries tashkiloti ham soliq to‘lamay yurgan edi. Bu yerda savol tug‘ilyapti, nima uchun aynan Temu? Biz barcha elektron platformalarga soliq majburiyatlarini bajarish bo‘yicha ogohlantirish xatini berganmiz”, deydi u.
Soliq qo‘mitasi raisining birinchi o‘rinbosari Wildberries 52 mlrd so‘m soliq to‘lab berganini eslab o‘tdi.
“Keyin bizda hech qanday eʼtiroz yo‘qligi haqida xulosamizni berdik. Temu bo‘yicha dastlabki hisob-kitoblarga ko‘ra, 46 mlrd so‘mlik soliq to‘lanmagani aniqlandi. Biz eʼtiroz xati qilib berganmiz ularga. Qachon soliqni to‘lasa ularning faoliyatini qonuniylashtirib beramiz”, dedi Mubin Mirzayev.
Temu’ning bloklanishi
O‘zbekistonda Temu platformasidan foydalanish 2025-yil 20-martdan boshlab cheklanishi haqida xabar berilgandi. Keyinroq Temu marketpleysi yuridik shaxs — O‘zbekiston Respublikasi rezidenti sifatida ro‘yxatdan o‘tgan edi.
Vazirlar Mahkamasining 2024-yil 26-dekabrdagi “O‘zbekiston Respublikasida elektron tijorat sohasini yanada rivojlantirish chora-tadbirlari to‘g‘risida”gi qarorining 2-bandi bilan elektron tijorat operatorlari, xususan, elektron savdo platformalari operatorlari sifatida faqat yuridik shaxslar — O‘zbekiston rezidentlari faoliyat yuritishi mumkinligi belgilangan.
“Daryo” 2024-yil dekabrida elektron tijorat vakillari — O‘zbekiston “Sellerlar” uyushmasi raisi Timur Rashidov, Uzum Market MCHJ XK sotuvchisi Muhammadjon Murodjonov hamda iqtisodchi Otabek Bakirov bilan suhbatlashganida Temu platformasiga ham to‘xtalib o‘tilgandi.
Timur Rashidov chet el marketpleyslarida suratda yoki videoda ko‘rsatilgan mahsulot boshqacharoq bo‘lib chiqishi mumkinligi, ammo iste’molchi o‘ziga yoqmagan tovarni qaytarib bera olmasligini aytib o‘tgandi.
Izoh (0)