Insult belgilari aniqlanishini tekshirish uchun Fast (F—face, A—arm, S—speech, T—test| yuz—qo‘l—nutq—test) testi ko‘pchilikka maʼlum. Ushbu kasallikda u quyidagi ko‘rsatkichlarni aniqlaydi:
Yuz — insult xavfi paytida biz yuzning asimmetriyasini, yaʼni tabassum paytida sezilarli bo‘lishini kuzatamiz: ko‘z qovoqlari tushishi, shuningdek, lablarning holati buzilishi mumkin.
Qo‘l — qo‘lda zaiflik. Bu ko‘pincha qo‘lda yoki oyoqda namoyon bo‘ladi. Odam ikkala qo‘lini bir vaqtning o‘zida ko‘tara olmaydi va ularni havoda ushlab turolmaydi.
Nutq — nutqning buzilishi, bu so‘zlarni bog‘lashda namoyon bo‘lishi mumkin, bunda bemor maʼno jihatidan bir-biriga bog‘liq bo‘lmagan so‘zlarni aytadi, buni shifokorlar dizartriya deb ataydi.
Sezuvchanlikning buzilishi — tananing biror-bir qismi sezuvchanlikni yo‘qotishi ham insultning belgisidir.
Belgilarning aniq bo‘lmasligi
Muammo shundaki, Fast testi 100 foiz aniq bo‘lmasligi mumkin. Kasallikka ishora qiluvchi bir nechta belgilar, ikki yoki uchta mezon bo‘lishi mumkin.
Shuningdek, unga kiruvchi barcha to‘rtta ko‘rsatkichning noaniq belgilari bo‘lishi mumkin. Yaʼni yuzning asimmetriyasi juda sezilarli bo‘lmaydi, oyoq-qo‘llarning zaifligi deyarli sezilarli bo‘lmaydi va u faqat juda nozik tekshiruv paytida aniqlanadi.
Oyoq-qo‘llarning zaifligi
Falaj va parezlar ularning og‘irligiga qarab 1 dan 5 ballgacha baholanadi. Bu yerda 5 to‘liq kuch, 1 yoki 0 esa plegiya yoki chuqur falajdir. Shuningdek, 4 ball bo‘lishi mumkin va shu bilan birga nozik tekshiruv paytida Barre sinovida qo‘lning sezilarli darajada tushib ketishi kuzatilishi mumkin. Insultga chalingan bemorlar bu vaziyatga duch kelganda uning yaqinlari buni sezmasligi mumkin.
Nutq
Nutq bilan biroz osonroq. Agar bemorda dizartriya paydo bo‘lsa, unda odamning aniq gapirmagani darhol bilinadi va bu darhol uning yaqinlariga seziladi. Shu bilan birga, agar bemor baʼzi so‘zlarni unutishni boshlasa, so‘zlarni aniq bo‘lgan iboralarga almashtirsa, lekin shu bilan birga buni xuddi shu so‘zlar ketma-ketligi bilan ifoda eta olmasa, bu sizni hushyorlikka chaqirishi kerak.
Shuningdek, bemorda harakat faoliyatida mantiq yo‘qolishi mumkin, u allaqachon shartli refleksga aylangan odatlarni, masalan, ovqat tayyorlash, hojatxonaga borish kabilarni to‘satdan vaziyatga mutlaqo mos kelmaydigan harakatlar bilan bajara boshlaydi. Masalan, u o‘zi uchun odatiy bo‘lgan harakatlar ketma-ketligini amalga oshira olmaydi. Bu ham insult haqida jiddiy o‘ylashga majbur qilishi kerak.
Sezuvchanlikning buzilishi
Bu eng murakkab jihat, chunki insultli bemor har doim ham o‘zini qanday his qilayotgani haqida ayta olmaydi. Bunday usul juda subyektivdir va uni obyektiv baholash, agar bemorda o‘tkazilgan test noto‘g‘ri baholangan bo‘lsa, juda qiyin. Lekin agar siz g‘ayrioddiy yuqori qon bosimi raqamlari yoki juda past raqamlar fonida Fast testlarining noaniqligiga duch kelsangiz, kasallik haqida o‘ylab ko‘rishingiz kerak.
Boshqa belgilar
Agar bemorda yuqori qon bosimi fonida ko‘ngil aynishi, bosh aylanishi, bosh og‘rig‘i va muvozanatni yo‘qotish kuzatilsa, lekin shu bilan birga, yuzning assimetriyasi, oyoq-qo‘llarning sezgirligi va kuchini yo‘qotish yoki nutqning buzilishi bo‘lmasa, bunday alomatlar har doim insult rivojlanish ehtimoli haqida o‘ylashga majbur qiladi.
Bundan tashqari, agar bemorda yuqori yoki past qon bosimi raqamlari fonida ko‘rishning hiraligi, ko‘rish maydonlarining yo‘qolishi va qusish bilan birga keladigan bosimli bosh og‘rig‘i aniqlansa, bu yana bir bor bizni o‘ylab ko‘rishga va tegishli choralarni ko‘rishga majbur qiladi.
Izoh (0)