Masjid tahoratxonasida gaz portlashi oqibatida 3 kishi halok bo‘lgan, 10 kishi turli darajada tan jarohati olgan. Bu haqda Favqulodda vaziyatlar vazirligi ma’lum qildi.
Ta’kidlanishicha, 31-mart kuni soat 12:19 da Andijon viloyati, Izboskan tumani “Mirzo Ulug‘bek” MFY, Yangibozor ko‘chasida joylashgan masjid hududidagi tahoratxonada gaz-havo aralashmasining chaqnashi sodir bo‘lganligi to‘g‘risida Andijon viloyati Favqulodda vaziyatlar boshqarmasiga xabar qilingan.
Zudlik bilan aytilgan manzilga 2 ta qutqaruv otryadi va 2 ta yong‘in-qutqaruv ekipaji yetib borgan. Hodisa natijasida tahoratxona devor va tom konstruksiyalariga zarar yetgan, yong‘in sodir bo‘lmagan.
Chaqnash oqibatida 3 nafar fuqaro (M.A., J.A. va B.B.lar). halok bo‘lgan, yana 10 nafar fuqaro (G‘.T., A.A., H.Z., I.R., M.M., I.Sh., K.Q., U.B., M.A. va M.B.lar) tan jarohati olib, shifoxonaga yuborilgan.
Voqea joyiga viloyat hokimi, FVB, IIB, MG, SSB, prokuratura va “Hududgazta’minot”, tuman FVDQT xizmatlari kuch, vositalari yetib borib, hodisa oqibatlari bartaraf etilmoqda.
Hodisa sodir bo‘lganligi xabar qilinganida vodiyda bo‘lib turgan bosh vazir o‘rinbosari O.Ramatov hamda favqulodda vaziyatlar vaziri general-mayor B.Qudratxo‘jayev Izboskan tumaniga yetib borgan.
Hozirda mazkur holat yuzasidan dastlabki tergovoldi surishtiruv ishlari olib borilmoqda.
Izoh (0)