2022-yilda xonanda va aktrisa Jennifer Lopes 20 yil o‘tib, qayta Ben Afllek bilan munosabatlarini yo‘lga qo‘ygani haqidagi xabarlar xorijiy OAVning eng qizg‘in yangiliklaridan biri bo‘ldi. Yoshlikdagi muhabbatini qaytarishga uringan Ben va Jen dabdabali to‘y ham o‘tkazdi, ammo ularning turmushi atigi ikki yil davom etdi.
2024-yilda er-xotin ajrashish uchun ariza berishdi, ajrim jarayoni yanvar rasman yakunlandi. Yaqinda GQ jurnaliga bergan intervyusida Afflek nega Lopes bilan ajralishga qaror qilgani haqida so‘zlab berdi:
“Ko‘pchilik nashrlar bizning ajrim haqida turli sabab va izohlarni keltirib o‘tdi, biroq haqiqat barchangiz o‘ylagandan ham oddiy. Munosabatlarda doim ham tomonlarning dunyoqarashi va fikrlari bir-biriga to‘g‘ri kelavermaydi”, dedi Ben.
Shuningdek, u yangiliklarda ta’kidlanganidek, ajrim sababi Jenniferning mashhurlikka bo‘lgan munosabatida emasligini ham qo‘shimcha qildi. Turli nashrlar Jey Loni o‘zining yulduzlik maqomiga haddan tashqari ahamiyat berishini hamda hayotining har bir qadamini shouga aylantirayotgani haqida yozgan edi. Afflek esa buni rad etdi.
“Men shunchaki shaxsiy hayotim bilan bog‘liq ma’lumotlarni ommaga ma’lum qilishni istamayman, bu men uchun juda noqulay”, deya yakunladi aktyor.
Ben Afflekning sobiq rafiqasi, aktrisa Jennifer Garnerdan uch nafar farzandi bor. Mish-mishlarga ko‘ra, Benning Jey Lo bilan ajrashishiga Afflekning sobiq rafiqasi bilan haddan tashqari iliq munosabati saqlanib qolgani sabab bo‘lishi mumkin. Aktyor Garner bilan tez-tez ko‘rishib turishi hamda Jey Lo bilan nikohda bo‘lgan vaqtda uning yelkasiga qo‘lini qo‘yib o‘tirgan suratlarning tarqalishi oilaviy nizolarga sabab bo‘lgani taxmin qilinmoqda.
Bundan tashqari, intervyu davomida Ben sobiq rafiqasi Jennifer Garnerni maqtadi:
“Jenniferdek ajoyib hamrohim borligidan juda xursandman. U farzandlarim onasi va ajoyib inson. Hozirda Garner bilan yaxshi munosabatdaman”, dedi u.
Yulduzli juftlik munosabatlarining tarixi 2002-yilga borib taqaladi, 2004-yilda ular nikohdan o‘tishi kerak edi, ammo Lopes to‘yni bir necha kun qolganda to‘xtatadi. Oradan qariyb yigirma yil o‘tib — 2021-yil iyul oyida Lopes va Afflek yana birga ekanini tasdiqladi. 2022-yil 16-iyulda esa juftlik munosabatlarini rasman qonuniylashtirdi.
Izoh (0)