Ko‘plab tomoshabinlar, ayniqsa, yoshi kattalar mashhur “Qizaloq va maymoq” multfilmidagi bir xususiyatga ahamiyat bergan bo‘lsa kerak: vaqt o‘tishiga qaramay, Masha o‘zgarmaydi. Multfilmda esa fasllar o‘taveradi, o‘nlab yangi epizodlar chiqadi, ammo bosh qahramon hali hamon shaddod va samimiy qizaloq bo‘lib qolaveradi. Savol tug‘iladi, nega Masha ulg‘aymaydi?
Buning sababi animatsion serial janri va formatining o‘ziga xos xususiyatlaridadir: multfilm 2-6 yoshdagi bolalar uchun mo‘ljallangan bo‘lib, ularning qiziqishi doimiy qolishi hamda auditoriya xotirasida yaxshi saqlanishi uchun bosh qahramon o‘zgarmasligi kerak. Agar Masha ulg‘aysa, u bolalarga endi unchalik yaqin va qiziqarli bo‘lmasligi mumkin, chunki ular Mashani aynan shu holicha yaxshi ko‘rib qolgan.
Bunda brend barqarorligi ham katta ahamiyatga ega. Multfilm brendi ostidagi mahsulotlar (o‘yinchoqlar, kitoblar, kiyim-kechaklar) aynan kichik Masha obrazi bilan bog‘liq.
Shuningdek, “Qizaloq va maymoq” serialining har bir qismi deyarli alohida hikoya sifatida ishlangan, unda vaqtning o‘tishi sezilmaydi. Shu sababli qahramonlar o‘zgarmaydi. Boshqa shu kabi mashhur multfilmlarda ham personajlar ulg‘aymaydi, masalan, “Tom va Jerri”, “Simpsonlar” va “Gubka Bob” kabi multfilmlar ham shu tamoyilga asoslangan.
Qolaversa, ertaklar dunyosida bularning bari tabiiy hol hisoblanadi.
Izoh (0)