O‘zbekistonda xususiy bog‘cha va maktablar uchun beriladigan imtiyozlar muddati 2030-yil 1-yanvarga qadar uzaytiriladi. Bu haqda “Maktabgacha va maktab ta’limi sohasida boshqaruv tizimi samaradorligini oshirishning qo‘shimcha chora-tadbirlari to‘g‘risida”gi prezident farmonida belgilandi.
Unga ko‘ra, prezidentning 2017-yil 15-sentyabrdagi “Nodavlat ta’lim xizmatlari ko‘rsatish faoliyatini yanada rivojlantirish chora-tadbirlari to‘g‘risida”gi qarorida nazarda tutilgan imtiyozlarning amal qilish muddati 2030-yil 1-yanvarga qadar uzaytiriladi.
Qarorda maktabgacha va umumiy o‘rta ta’lim sohasida nodavlat ta’lim xizmatlarini ko‘rsatish faoliyati bilan shug‘ullanadigan yuridik shaxslar quyidagi to‘lovlardan ozod qilinishi belgilangandi:
- barcha turdagi soliq va davlat maqsadli jamg‘armasiga majburiy to‘lovlardan (yagona ijtimoiy to‘lovdan tashqari), bunda ozod qilinayotgan mablag‘lar ularni zamonaviy o‘quv vositalari bilan jihozlash, zarur mahsulotlar va jihozlar sotib olish, bino va inshootlarni rekonstruksiya qilish, kapital ta’mirlash hamda aholining ijtimoiy himoyaga muhtoj qatlamiga bepul ta’lim xizmatlarini ko‘rsatishga maqsadli yo‘naltiriladi;
- mehnat shartnomasi asosida ta’lim-tarbiya jarayoniga jalb qilingan xorijiy o‘qituvchi va mutaxassislarning oylik ish haqidan yagona ijtimoiy to‘lov.
Farmon bilan, shuningdek, O‘zbekistonda ishlab chiqarilmaydigan, belgilangan tartibda shakllantiriladigan ro‘yxatlar bo‘yicha nodavlat maktabgacha va umumiy o‘rta ta’lim tashkilotlarini jihozlash va faoliyatini ta’minlash uchun olib kiriladigan zamonaviy o‘quv va laboratoriya uskunalari, kompyuter texnikasi, dasturiy mahsulotlar, o‘quv va ilmiy-metodik adabiyotlar, anjomlar va moddiy-texnik resurslar 2030-yil 1-yanvarga qadar muddatga bojxona to‘lovlaridan ozod etiladi (bojxona rasmiylashtiruvi uchun yig‘imlar bundan mustasno).
Ushbu farmon bilan maktab direktori va uning o‘rinbosarlari hamda maktabgacha taʼlim tashkiloti direktorlari ish haqi miqdorlari oshirilishi, maktab direktorlari va o‘rinbosarlariga har oylik ustamalar belgilanishi, Maktabgacha va maktab ta’limi vazirligi xodimlari 1-apreldan qo‘shimcha rag‘batlantirilishi ham ko‘zda tutilgan.
Izoh (0)