Ukraina prezidenti Vladimir Zelenskiy G‘arb davlatlarini Rossiyaga bosim o‘tkazish borasida sustkashlikda aybladi. Uning aytishicha, u kelasi hafta Nyu Yorkda bo‘lib o‘tadigan BMT Bosh assambleyasida Donald Tramp bilan uchrashib, Rossiyaga qarshi sanksiyalar qo‘llashni so‘raydi. Bu haqda The Guardian xabar berdi.

Zelenskiy agar Rossiya prezidenti Vladimir Putin o‘zaro muzokaralardan yoki otashkesimdan bosh tortsa, yangi sanksiyalar qo‘llanilishi kerakligini ta’kidlamoqda. U Kiyevda bir guruh jurnalistlar, jumladan, Guardian nashri bilan suhbatda voqealar rivojidan hafsalasi pir bo‘lganini bildirgan. Shuningdek, Ukraina prezidenti AQSH sanksiyalarini Yevropaning harakatlariga bog‘lab qo‘yish bosimni susaytirayotganini aytgan.


“Agar Trampdan sanksiyalar yoki keskin choralarni kutayotgan bo‘lsak-u, hech qanday harakat bo‘lmasa — bu faqatgina vaqtni boy berishdir”, degan Zelenskiy.

Unga ko‘ra, Yevropaning Rossiyaga bosimni kuchaytirishi uchun Tramp harakat qilishi kerak. Zelenskiy, shuningdek, Slovakiya va Vengriya kabi Rossiya bilan aloqalarini uzmagan (energiya sohasida) davlatlarga ham AQSH orqali bosim o‘tkazilishi mumkinligini ta’kidlagan.

Prezident, shuningdek, Putin bilan istalgan formatda uchrashishga tayyorligini qayd etgan va AQSHdan xavfsizlik kafolatlari masalasida aniqlik kiritishni kutayotganini bildirgan.