Toshkent shahar Sergeli tumanidagi maktablarning birida erkak o‘qituvchi xonani qulflab, o‘quvchisiga tegajog‘lik qildi. Bu haqda shahar sudlari axborot xizmati “Daryo”ga xabar berdi.
Ma’lum qilinishicha, 4-mart kuni Sergeli tumanida joylashgan 322-maktab o‘qituvchisi E.P. 10-sinf o‘quvchisi R.F.ni huquq darsidan har xil bahonalar qilib xonasiga chaqirgan, eshikni qulflab, kel, bir quchoqlay, deb tegajog‘lik qilmoqchi bo‘lgan.
Holat yuzasidan sudlanuvchi Ma’muriy javobgarlik to‘g‘risidagi kodeksning 411-moddasi 1-qismida nazarda tutilgan huquqbuzarlikni sodir etganlikda aybli deb topildi va 5 sutka ma’muriy qamoq jazosi tayinlandi.
Bundan avval Toshkent shahar Yunusobod tumanida o‘qituvchi erkak sobiq o‘quvchisini do‘stining oldida haqoratlab, tegajog‘lik qilgan edi.
Shuningdek, Toshkent shahrining Yakkasaroy tumanidagi rassomchilik maktabi o‘qituvchisi dars paytida o‘quvchi qizga shilqimlik qilgani uchun 5 sutkaga qamalgandi. Shundan so'ng bolalar ombudsmani taqdimnomasi bilan sud qaroriga protest kiritildi.
Izoh (0)