Andijon viloyati hokimining sobiq o‘rinbosari Botirjon Xamroyev va 28 nafar mansabdorlarga qarshi qo‘zg‘atilgan jinoyat ishi sudda ko‘rilmoqda. Bu haqda “Daryo” manbasi xabar bermoqda.
O‘tgan yilning noyabr oyida Andijon viloyati hokimining sobiq o‘rinbosari — viloyat investitsiyalar, sanoat va savdo boshqarmasi boshlig‘i Botirjon Hamroyev o‘tkazilgan tekshiruvlar davomida byudjet mablag‘larining talon-toroj qilinishi, mansab vakolatini suiiste’mol qilish va boshqa holatlar bo‘yicha tergovga chaqirtirilgani va protsessual tartibda ushlangani xabar qilingandi.
Shundan so‘ng uning uyidan katta miqdorda pul chiqqani haqida xabarlar paydo bo‘lgan, biroq bu borada rasmiy ma’lumot berilmagan edi.
“Daryo” manbasining ma’lum qilishicha, mazkur ishga jami 29 kishi ayblanuvchi sifatida jalb qilingan bo‘lib, ishni ko‘rish Jinoyat ishlari bo‘yicha Yunusobod tuman sudi tomonidan 6-noyabrda boshlangan.
Sudlanuvchilar Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish) 3-qismi a-bandi (juda katta miqdorda) va v-bandi ( uyushgan guruh tomonidan yoki uning manfaatlarini ko‘zlab), 209-moddasi (Mansab soxtakorligi) a-bandi ( takroran yoki xavfli retsidivist tomonidan) va b-bandi (uyushgan guruh manfaatlarini ko‘zlab sodir etilgan bo‘lsa) nazarda tutilgan jinoyatlarni sodir etganlikda ayblanmoqda.
Mazkur ish JIB Yunusobod tumani sudi sudyasi Zafar Latipov raisligida ko‘rilmoqda.
Izoh (0)