Toshkent shahri hokimi o‘rinbosari Shahnoza Sultonova ayni kunda arzimas muammolar sabab turmush o‘rtog‘idan ajralib, hokimlar qabulida moddiy taʼminot so‘rayotgan, boqimandalik kayfiyati bilan yashayotgan ayrim fuqarolar haqida gapirib, “Qabullarda bunday insonlar ko‘p uchraydi, eng og‘riqli muammo shu. “Shantaj” desak ham to‘g‘ri iborani ishlatgan bo‘lamiz”, dedi. Hokim o‘rinbosari bu haqda Yangihayot tumani hokimligida bo‘lib o‘tgan matbuot anjumanida gapirdi.
Matbuot anjumanida so‘z olgan “Daryo” jurnalisti poytaxt hokimi o‘rinbosari hamda Yangihayot tumani hokimligi masʼuliga yuzlanib, “Ilgari ayollar erimdan ajrashganman, bevaman deyishga uyalgan bo‘lsa, bugun baʼzi ayollar rahbarlar qabuliga borganida g‘urur va faxr bilan ‘men bevaman, menga yordam bering, uy bering, joy bering, pul bering’, deyishni odat qildi. To‘g‘ri, rahbarlar murojaatchilarga yordam berishi kerak, lekin ‘men bevaman’ degan murojaatchiga uy berish, pul berish — oilasida ozgina yetishmovchilik bo‘lib turgan, erining topishidan qoniqmayotgan ayollarning fikrini buzmasmikin? Men ham erimdan jarashsam demak uy berishadi, moddiy taʼminlashadi degan fikrga borib qolishmayapti? Bunga nima deysiz”, deya savol berdi.
Biz uchun dolzarb va og‘riqli muammo haqida savol berdingiz. So‘nggi vaqtlarda bunday holatlar judayam ko‘p uchrayapti. Boshqachasiga aytadigan bo‘lsak, “shantaj” desak ham to‘g‘ri iborani ishlatgan bo‘lamiz. Ming afsuski u hokimiyatdan bu hokimiyatga, bu hokimiyatdan u hokimiyatga yurib, shunday talab qo‘yayotgan ayollarimiz bor. Buni kasb qilib olishgan, — dedi Shahnoza Sultonova.
Hokim o‘rinbosarining aytishicha, ular murojaatchi fuqarolarga rahbarlar ham oddiy odamlar qatori ekanligini, vakolatidan chetga chiqolmasligini, faqat vakolati doirasida ko‘mak berishga qodirligini tushuntirib keladi.
Masalan xotin-qizlar masalalari bo‘yicha o‘rinbosar faqatgina shu masalaga dahldor muammolarni hal qilishini, boshqa o‘rinbosarlar vakolatiga kiruvchi masalalarni hal qilishga qodir emasligimizni, boshqa o‘rinbosarlarga faqatgina murojaatchi kelganini, uni qiziqtirayotgan masala nimadan iboratligini aytib, iltimos qilishimiz mumkinligini aytamiz, — deydi Shahnoza Sultonova.
Yangihayot hokimi o‘rinbosari, tuman oila va xotin-qizlar bo‘limi boshlig‘i Iroda Abdullayeva yolg‘iz onaligini pesh qilib, bundan foydalanishga urinishlarni qoralashini, bu holat uyatli ekanini aytmoqda.
Biz bunday ayollarning maʼnaviyati va maʼrifatini o‘stirishimiz kerak. Bu narsa qay darajada xunuk eshitilishini ayollarimiz bilishi kerak. Vaqtida eri urushga ketib qaytib kelmagan paytda hayotning barcha qiyinchiliklariga o‘zi chidab, farzandlarini katta qilayotgan oilalar ko‘p edi. Mana shunaqa ayollarni namuna qilib ko‘rsatishimiz kerak, — dedi u.
Izoh (0)