O‘zbekiston musulmonlari idorasi Fatvo markazining 2025-yil uchun zakot nisobi, fitr sadaqa va fidya miqdori bo‘yicha qarori e’lon qilindi.
Unga ko‘ra, Fatvo markazi bu yilgi ramazon oyi uchun zakot nisobini 85 gramm 585 probali tillaning qiymatidan kelib chiqib 61 mln 200 ming so‘m deb belgiladi. Shunga asosan, kimda zaruriy ehtiyojidan tashqari kamida 61 mln 200 ming so‘m qiymatidagi pul mablag‘i yoki ushbu qiymatdagi savdo-tijorat moli bo‘lsa, jami mablag‘ining qirqdan biri (2,5 foiz)ni zakot niyatida haqdorlarga beradi.
Fitr sadaqasining miqdori quyidagicha belgilandi:
- 2 kg bug‘doy unidan — 10 000 (o‘n ming) so‘m;
- 4 kg arpadan — 16 000 (o‘n olti ming) so‘m;
- 2 kg mayizdan — 110 000 (bir yuz o‘n ming) so‘m;
- 4 kg xurmodan — 180 000 (bir yuz sakson ming) so‘m deb belgilandi.
Har kim o‘z imkoniyatiga qarab ushbu to‘rt mahsulotdan xohlagan biri yoki uning qiymatini fitr sadaqasi niyatida bersa kifoya qiladi.
Fidya miqdori
Bir kunlik fidya miqdori fitr sadaqaning miqdori bilan bir xil bo‘ladi. Shunday ekan, har kim o‘z imkoniyatiga qarab ushbu to‘rt mahsulotdan xohlagan biri yoki uning qiymatini fidya niyatida bersa kifoya qiladi.
O‘zbekistonda ramazon oyi 1-mart, shanba kuni boshlanadi. Prezident qaroriga ko‘ra, ushbu oyda ehtiyojmandlar hamda ilm-maʼrifat yo‘lida izlanayotgan yoshlarga yordam berish bo‘yicha tashabbuslarni qo‘llab-quvvatlashga, atrof-muhitni asrash, muqaddas qadamjo, ziyoratgoh va qabristonlarni obodonlashtirish, ko‘chatlar ekishga hamda ramazon oyi bilan bog‘liq tadbirlarda me’yorga amal qilish va isrofgarchilikka yo‘l qo‘ymaslikka alohida eʼtibor beriladi.
Izoh (0)