Farg‘ona viloyatida olti oy avval ta’mirlangan avtomobil yo‘lining bir qismi o‘pirilib tushdi. Viloyat avtomobil yo‘llari boshqarmasi holatga izoh berdi.
Unga ko‘ra, 23-fevral kunidan 24-fevral kuniga o‘tar kechasi Farg‘ona halqasi avtomobil yo‘lining Bog‘dod tumani, “Qaxat” MFY hududidan o‘tgan 286-kilometrida yo‘lning o‘ng tomonidan oqib o‘tuvchi Farg‘ona kanalida suv sathi ko‘payib avtomobil yo‘lining tag qismidan sizib o‘tishi natijasida asfalt yo‘l qoplamasida cho‘kish yuzaga kelgan.
Hozirgi vaqtda mazkur avtomobil yo‘lining Qo‘qon—Farg‘ona yo‘nalishi bo‘yicha 285-kilometr va Farg‘ona—Qo‘qon yo‘nalishining 288-kilometrlaridan vaqtinchalik harakat cheklangan. Yo‘lning cho‘kkan qismida ta’mirlash ishlari olib borilmoqda.
Mazkur avtomobil yo‘li 2024-yil avgust oyida joriy ta’mirlangan. Transport vositasi harakat jadalligi sutkasiga 30 000-35 000 tashkil etadi, harakat vaqtincha to‘xtatilib, tashkil etilgan avtomobil yo‘llari 25 km ga uzaygan. 24-fevral kuni soat 18:00 ga qadar avtomobil yo‘lida ta’mirlash ishlari yakunlanib transport vositalarining harakati yo‘lga qo‘yilishi rejalashtirilgan.
Bundan avval Toshkent shahrida joylashgan “Samarqand darvoza” savdo markazi oldida avtomobil yo‘l qismida cho‘kish yuz bergan edi. Hodisa oqibatida avtomobilga yetkazilgan zarar sug‘urta kompaniyasi tomonidan qoplab beriladigan bo‘lgan.
2024-yil 29-yanvarda o‘tkazilgan videoselektor yig‘ilishida davlat rahbari bu sohaga alohida to‘xtalib, yo‘llarni sifatli qurish, ko‘chalar bo‘yida xizmatlarni rivojlantirish bo‘yicha ko‘rsatmalar bergan edi. Bu borada barcha hududlarda ishlar boshlab yuborilgan.
Izoh (0)