Ukraina Qurolli kuchlarining sobiq bosh qo‘mondoni Valeriy Zalujniy 2022-yilda Belgorod yo‘nalishida hujum qilish rejasini taklif etgan. Bu haqda Zalujniyning maslahatchisi bo‘lgan general-mayor Viktor Nazarov ma‘lum qildi.
Nazarovning aytishicha, 2022-yil dekabr oyida Ukraina Milliy xavfsizlik va mudofaa kengashi apparatidagi yig‘ilishlardan birida Zalujniy ma’ruza qilgan. Unda Rossiya bilan urush strategiyasiga oid bir nechta taklif mavjud edi. Ulardan biri “harbiy harakatlarni dushman hududiga ko‘chirish”ni nazarda tutgan.
“O‘sha paytda biz taklif etgan variantda Belgorod viloyati haqida gap borardi. Dushmanga jiddiy tahdid solish uchun aynan shunday harakat yo‘nalishlari taklif qilingandi. Men esa yanada qat’iyroq maqsadlarni ilgari surdim”, dedi Nazarov.
Belgorodning o‘zini egallash rejalashtirilganmi, degan savolga javoban, Nazarov rus armiyasini Xarkovga zarba berish imkoniyatidan mahrum qilish, Donbassdagi guruhning ta’minotini xavf ostiga qo‘yish uchun qamal qilish yoki qurshovga olish haqida gap ketayotganini tushuntirdi.
Uning so‘zlariga ko‘ra, takliflar bildirilgan va ularni aniqlashtirish uchun “siyosiy qaror yetarli edi”. Ammo Zalujniy shundan so‘ng iste’foga chiqarilgani sababli, Nazarov bu g‘oyalar hech kimni qiziqtirmagandek qolganini aytdi.
Zalujniy iste’fosi
Vladimir Zelenskiy 2024-yil 8-fevralda Valeriy Zalujniyni Ukraina Qurolli kuchlari bosh qo‘mondoni lavozimidan ozod etdi. Uning o‘rniga Quruqlik qo‘shinlari qo‘mondoni general-polkovnik Aleksandr Sirskiy tayinlandi.
2024-yil 6-avgustda Ukraina armiyasi Kursk viloyatida hujumga o‘tib, bosib olingan Suja shahrigacha yetib bordi. Sujada Ukraina harbiy komendaturasi tashkil etildi, tinch aholining bir qismi shaharda qolmoqda. Zelenskiyning o‘zi Ukraina Qurolli kuchlarining Kursk viloyatidagi pozitsiyasini Rossiya va Ukraina o‘rtasida tinchlikka erishish bo‘yicha barcha ehtimoliy muzokaralarda “kuchli kozir” deb ta’rifladi.
Izoh (0)