Allergiya tufayli oqishi va shamollash quloqlar salomatligiga ta’sir qiladi. Agar vaqtida kerakli choralar ko‘rilsa, ushbu yoqimsiz holatni qisqa vaqt ichida yo‘q qilish mumkin. Bugun shamollash vaqtida quloqlar bitib qolganda qanday yordam ko‘rsatish haqida ma’lumot beramiz.
O‘RVI paytida quloq bitishining asosiy sabablari
O‘zimizga birinchi yordam berish va quloqlarni davolashdan avval nima uchun shamollash quloqlarga ta’sir qilishi haqida tushunchaga ega bo‘lish kerak. Burun bo‘shlig‘i va sinuslar (sinuslar — ko‘z va burun atrofi va bosh suyagi old qismi ichidagi bo‘shliqlar)da yallig‘lanish bor yoki yo‘qligini bilish lozim. Chunki bu sohadagi shamollashlar eshitish naychasiga ta’sir qiladi. Bunda uning devorlari torayadi va quloq bitish hissi paydo bo‘ladi.
Agar o‘z vaqtida davolanmasa, eshitish naychasining yallig‘lanishi eshitish qobiliyatining qisman yoki to‘liq yo‘qolishiga olib kelishi mumkin.
Shamollaganda burun bitsa: birinchi yordam qanday ko‘rsatiladi?
Xalq tabobatida quloq bitishidan vaqtinchalik xalos etadigan bir nechta usullar mavjud:
- Avvalo burunni shunchaki qoqish orqali ortiqcha suyuqlikdan burun bo‘shlig‘ini tozalang va tuzli eritma bilan chaying. Agar shundan keyin ham quloq bitishi ketmasa, burun yo‘llarini bunday usulda tozalashni vaqtinchalik to‘xtating va uning o‘rniga qon tomirlarini toraytiruvchi maxsus burun spreyi va tomchilardan foydalaning.
- Massaj: quloq va burunni 15 daqiqa davomida massaj qiling, bunda quloq rakovinasi va burunning ikki chetiga alohida e’tibor bering.
Shamollash tufayli bitib qolgan quloqlarni tibbiy preparatlar yordamida davolash
Agar quloqlaringiz burun oqishi tufayli bitib qolganda yuqoridagi usullar yordam bermasa, dori vositalaridan foydalanishga o‘tish mumkin.
- Burunga shifokor retseptisiz beriladigan tomirlarni toraytiruvchi preparatlarni tomizish: Bu usul burun yo‘llari va sinuslardagi shishlarni kamaytiradi va natijada eshitish naychasiga keladigan bosim yo‘qoladi. Bu esa sinus bo‘shlig‘idagi o‘tkazuvchanlikning yaxshilanishiga zamin yaratadi. Ammo bunday usul vaqtinchalik yengillik berib, shifokor tomonidan belgilanadigan davolanish muolajasining o‘rnini bosa olmaydi.
- Quloqda yallig‘lanish va shishishni kamaytiradigan, mikroblarga qarshi ta’sirga ega bo‘lgan maxsus tomchilardan foydalanish mumkin.
- Spirtli kompress yordamida quloqni isitish — bir necha qatlam buklangan doka bo‘lagini iliq spirt bilan namlab, uni quloq ustiga qo‘yish va ustidan mato bilan o‘rab, bir necha soatga qoldirish mumkin.
Yuqoridagi tavsiyalar tez tibbiy yordam yoki shifokor ko‘rigiga qadar qilinishi mumkin bo‘lgan birinchi yordamdir. Ularning hech qaysi biri to‘liq davolanish kursining o‘rnini bosa olmaydi. Har qanday burun bitish holatida otolaringologga tashrif buyurishni unutmang. Jiddiy asoratlarning oldini olish o‘z zimmamizdadir.
Izoh (0)