O‘zbekistonda kriptoaktivlar sohasida xizmat ko‘rsatuvchi Coinpay va Binance qo‘shma platformasi ish boshladi. Bu haqda 28-yanvar kuni Coinpay mahalliy kriptobirjasi matbuot xizmati xabar berdi.
17-yanvar kuni Istiqbolli loyihalar milliy agentligi eng yirik kriptobirjalardan biri — Binance tomonidan O‘zbekiston foydalanuvchilariga xizmat ko‘rsatish masalasi hal qilinganini, ushbu kriptobirja O‘zbekiston hududida o‘z faoliyatini qonunchilik bilan belgilangan tartibda mahalliy Coinpay MCHJ orqali amalga oshirishini e’lon qilgandi.
Coinpay kriptoaktivlar bilan operatsiyalar faqat saytdagi rasmiy havola orqali amalga oshirilishi kerakligi eslatib o‘tildi. Tashqi p2p platformalari yoki boshqa xizmatlardan foydalanish qonunchilikni buzish hisoblanadi va yuridik javobgarlikka olib kelishi mumkin.
Kompaniya, shuningdek, kriptoaktivlar bilan bog‘liq operatsiyalar ularning o‘zgaruvchanligi tufayli yuqori xatarlar bilan bog‘liqligini bildirdi. Foydalanuvchilarga savdolarni boshlashdan oldin raqamli aktivlar bilan ishlashning o‘ziga xos xususiyatlarini o‘rganish va ehtimoliy moliyaviy xatarlarni hisobga olish tavsiya etildi.
Coinpay — kriptoaktivlar aylanmasi sohasida rasmiy xizmat ko‘rsatuvchi provayder bo‘lib, u kriptobirja va kriptodo‘kon faoliyatini amalga oshirish uchun tegishli litsenziyalarga ega.
O‘zbekiston rezidentlari Binance platformasiga Coinpay’ning tegishli resurslari orqali kirishlari mumkin. Foydalanuvchilar o‘z mablag‘larini bank kartalari va milliy to‘lov tizimlari orqali milliy valyutada kiritish hamda chiqarish imkoniyatiga ega bo‘ldi.
Binance kriptobirjasi
Binance savdo hajmi bo‘yicha ilk va eng yirik kriptovalyuta birjalaridan biridir. Platforma 2017-yilda tashkil etilgan va Kayman orollarida ro‘yxatdan o‘tgan. 2023-yil noyabrda pul yuvish va bank sirini buzgani uchun Binance Amerika rasmiylariga qariyb 4,5 milliard dollar jarima to‘laydigan bo‘lgani to‘g‘risida xabar berilgandi.
Izoh (0)