D vitamini sog‘liq uchun juda muhim ozuqa moddasidir va uning asosiy vazifasi organizmda kalsiy va fosfor muvozanatini tartibga solishdir. Bu esa suyaklar, tishlar va mushaklarning sog‘lom bo‘lishiga yordam beradi. Shifokor-gastroenterolog Yelena Mironova D vitaminining hazm qilish tizimi va ichaklar faoliyatidagi juda muhim roli haqida ma’lumot berdi.
“Hozirda ko‘plab odamlar D vitamini yetishmovchiligidan aziyat chekmoqda, bu muammo yosh yoki etnik kelib chiqishdan qat’i nazar har kimda paydo bo‘lishi mumkin. Biz D vitaminini ikkita tabiiy usulda qabul qilamiz.
Birinchi usul — bu oziq-ovqat orqali qabul qilish, ya’ni tarkibida D vitamini bo‘lgan mahsulotlarni iste’mol qilish. Asosan bu baliqlar: seld, skumbriya, losos, sardina, shuningdek, sut mahsulotlari, tuxum sarig‘i, jigar va qizil go‘shtlardir.
Ikkinchi usul — bu quyosh nurlari ta’sirida terida endogen D vitamini ishlab chiqarilishidir”, dedi shifokor.
“Afsuski, ushbu ikki usul ham kunlik ehtiyojni to‘liq qoplamaydi, bu esa ba’zan sog‘lig‘imizga ta’sir qiladi. Masalan, D vitamini yetishmovchiligi ingichka ichakning shilliq qavatida jiddiy buzilishlarga olib keladi. Natijada ichak shilliq qavatidagi mikrobioma sifat va miqdor jihatidan kamayadi, bu esa himoya vazifasini bajaruvchi peptidlarga ta’sir qiladi. Natijada ichakning himoya funksiyasi va hazm qilish faoliyati sezilarli darajada buziladi”.
Gastroenterolog shifokor mazkur vitamin yetishmovchiligini qanday qoplash mumkinligini haqida ham ma’lumot berdi:
“Agar siz ovqatlanish yoki quyosh nuri orqali D vitaminiga bo‘lgan kunlik ehtiyoj normasini qoplay olmasangiz, maxsus preparatlar xarid qilishingiz mumkin. Eng yaxshi o‘zlashtiriladigan D vitamin asosan yog‘li eritmalar ko‘rinishida bo‘ladi. Shuningdek, qon tahlili topshirib, D vitamini darajasini aniqlash va kerakli dozani belgilash uchun shifokorga murojaat qilishingizni maslahat beraman”, deya xulosa qildi Yelena Mironova.
Izoh (0)