ISHIDga aloqador isyonchilar Kongoning Shimoliy Kivu provinsiyasida 89 nafar tinch aholini o‘ldirdi. Bu haqda BMTning Markaziy Afrikadagi tinchlikparvar missiyasi (MONUSCO)ga tayanib, Al Arabiya xabar berdi.

Rasmiy bayonotga ko‘ra, hujumlar Shimoliy Kivu provinsiyasining bir qancha hududlarida 13- 19-noyabr kunlari oralig‘ida “Ittifoqdosh demokratik kuchlar” (Allied Democratic Forces — ADF) jangarilari tomonidan amalga oshirilgan. Halok bo‘lgan 89 kishi orasida kamida 20 nafar ayol va bolalar bor.

Shifoxonaga hujum va talon-taroj

Ta’kidlanishicha, hujumlardan birida isyonchilar Byambve shaharchasidagi Katolik cherkovi tomonidan boshqariladigan tibbiyot markaziga hujum qilgan. Ular bu yerda kamida 17 kishini o‘ldirgan, jumladan, tug‘ruqxonaga kelgan ayollarni ham. Shuningdek, ular bemorlar yotgan to‘rtta palatani yondirib yuborgan.

Bayonotda aytilishicha, isyonchilar tomonidan sodir etilgan boshqa qonunbuzarliklar qatoriga odam o‘g‘irlash va tibbiy anjomlarni talon-taroj qilish ham kiradi.

“MONUSCO Kongo rasmiylarini ushbu qirg‘inlarni sodir etganlar va ularga sherik bo‘lganlarni aniqlash hamda ularni javobgarlikka tortish uchun mustaqil va ishonchli tergov ishlarini zudlik bilan boshlashga chaqiradi”, deyiladi bayonotda.

ADFning avj olayotgan hujumlari

Oktyabr oyida ADF isyonchilari Shimoliy Kivu provinsiyasidagi Mukondo qishlog‘iga tunda hujum uyushtirib, 19 nafar tinch aholining hayotiga zomin bo‘lgan edi. Sentyabr oyida esa ADF so‘nggi oylardagi eng qonli hujumlaridan biri uchun javobgarlikni o‘z zimmasiga olgan — o‘shanda Kongoning sharqidagi janoza marosimida 60 dan ortiq tinch aholi vakili hayotdan ko‘z yumgandi.

ADF dastlab Ugandada isyonchi kuch sifatida tashkil topgan, 1990-yillarning oxiridan buyon qo‘shni Kongo o‘rmonlarini makon tutgan. Bu guruh ISHID tomonidan o‘z filiali sifatida tan olingan. Kongo armiyasi va Uganda kuchlari ADFga qarshi operatsiyalarni davom ettirayotgan bo‘lsa-da, guruhning hujumlari to‘xtamayapti.


ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.