Suriyaning Halab, Idlib, Hama, Damashq va Raqqa shaharlari, agar tinchlik shartlari boshqacha bo‘lganida, Birinchi jahon urushi natijalariga ko‘ra, Turkiya tarkibidagi provinsiyalar markazlariga aylanardi. Turkiya prezidenti Rajab Toyyib Erdo‘g‘on bu haqda bayonot berdi.
Birinchi jahon urushi mintaqamiz chegaralarini qayta ko‘rib chiqqanida, sharoit boshqacha bo‘lganida nima bo‘lardi? Biz Halab, Idlib, Hama, Damashq, Damashq va Raqqa deb ataydigan shaharlar bizning Antep, Hatay va Urfa kabi provinsiyalarimiz bo‘lishi mumkin edi. Bu shaharlar chegaralarimizdan tashqarida bo‘lgani uchungina u yerda yashovchi odamlar bilan aloqalarimizni butunlay uzmoqchi emasdik, dedi Erdo‘g‘on.
Suriyaning Halab, Idlib va Raqqa shaharlari Turkiya chegarasiga yaqin, Hama va Damashq esa mamlakat ichkarisida joylashgan. Turkiyaning Gaziantep (ilgari Antep), Shonliurfa (ilgari Urfa) va Hatay shaharlari, o‘z navbatida, Suriya chegarasi yaqinida joylashgan.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Hama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi.
Prezident Bashar Asad oilasi bilan mamlakatni tark etdi. Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.
10-dekabr kuni Idlib shahrida qo‘zg‘olonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan televidenie murojaatida bu lavozimni kamida 2025-yil 1-martgacha egallab turishini ma’lum qildi.
Izoh (0)