Toshkentning “Paxtakor” klubida bosh murabbiy o‘zgardi. Klubga yangi bosh murabbiy sifatida portugaliyalik mutaxassis Pedro Moreyra ish boshlaydi. Bu haqda matbuot anjumanida maʼlum qilindi.
Jahongir Ortiqxo‘jayevning ma’lum qilishicha, yangi bosh murabbiy bilan 1+1 shaklida shartnoma imzolangan. Unga 4 nafar hamyurti yordam beradi.
Klub raisi Jahongir Ortiqxo‘jayev shuningdek, jamoaga ustozlik qilib kelgan Maksim Shatskix klub raisi maslahatchisi lavozmida ishlashda davom etishini maʼlum qildi.
“Shatskix klubdan ketgani yo‘q. Qatorasiga ikkita chempionlik uchun unga rahmat aytamiz. Bu mavsumda chempionlik maqsadi qo‘ymagandik. U direktorlar kengashida menga maslahatchi bo‘lib qoladi”, dedi Toshkent shahrining sobiq hokimi.
Shuningdek, Jahongir Ortiqxo‘jayevning aytishicha, kelgusi yil bahordan “Paxtakor” stadioni FIFA standartlariga moslab rekonstruksiya qilinadi. Klub raisi yangi murabbiyning maoshini ochiqlamaslikka qaror qildi.
“Moreyrani maoshini ochiqlamaslik uchun shartnomaga qo‘l qo‘yganmiz. Qancha olsa ham barakasini bersin, halollab olsin”, dedi Ortiqxo‘jayev.
Maʼlumot uchun, Pedro Moreyra o‘z vaqtida “Roma” va “Shaxtyor” klublarida Paulu Fonsekaga assistentlik qilgan. “Sporting” yoshlar jamoasida ham ishlagan.
Izoh (0)